काठमाडौं- सरकारको कामलाई लिएर पछिल्लो समय विरोध र आलोचना बढिरहँदा प्रधानमन्त्री केपी शर्मा ओलीले भने त्यसबारे तीतो जवाफ फर्काएका छन् ।

नेपाल राष्ट्रिय भूतपूर्व सैनिक तथा प्रहरी सङ्गठनले आइतबार काठमाडौंमा आयोजना गरेको कार्यक्रमलाई सम्बोधनका क्रममा उनले आफ्नो विरोध गर्नेलाई ‘भाडामा खटाइएकाहरू’ भनेका छन् ।

उनले आफूलाई अलोकप्रिय भएको भनेर टिप्पणी गर्नेहरूलाई पनि जवाफ दिने क्रममा तीतो जवाफ फर्काएका हुन् । ‘भाडामा खटाइएकाहरूले मेरो विरोध गरेका छन्’, उनले भने, ‘सरकारले आफ्नो गतिमा काम गर्दैछ, विरोधले फरक पर्दैन ।’

उनले सम्बोधनका क्रममा लोकतन्त्र भनेको छाडातन्त्र नभएको पनि बताएका छन् । ‘नेपाल लडेर बनेको र लडेर बचाएको राष्ट्र भएकाले सिंहदरबार वा बालुवाटार कब्जा गर्छौँ, मार्छौँ, काट्छौँ भन्नु छाडातन्त्र हो’, उनले भने, ‘त्यस्ता क्रियाकलाप सैह्य हुन सक्दैनन् ।’

ओलीले सत्ता सौदाबाजीका लागि राष्ट्रियताका हितका प्रश्नमा कुनै सम्झौता नगरिने पनि बताए । एमाले र नेपाली कांग्रेससहित मिलेर बनेको वर्तमान सरकार राष्ट्रिय एकताको भावनाको रक्षा र देशको हितका लागि कटिबद्ध भएर काम गरिरहेको उनले बताए ।

सरकारले सय दिन पुग्दा उल्लेख्य गतिलो काम नगरेको सन्दर्भमा चर्को आलोचना भइरहेको छ । विकास बजेट खर्चदेखि प्राकृतिक प्रकोपीडिलताई राहतमा समेत सरकारको प्रभावकारी भूमिका नरहेको जनगुनासो छ।

तर ओलीले आफ्नो सय दिने उपलब्धि सार्वजनिक गर्दै सरकार सफल हुँदै गएको बताएका थिए । सुरुमा केही सुस्त भए पनि सरकारले अब विस्तारै गति लिएर जनमुखी काम गर्ने ओलीले बताएका थिए ।