काठमाडौं – संयुक्त राष्ट्रसंघको महासभामा सहभागी हुन अमेरिका गएका बंगलादेशको अन्तरिम सरकारका प्रमुख मोहम्मद युनिसविरुद्ध प्रदर्शन भएको छ ।

बंगलादेशमा अल्पसङ्ख्यकविरुद्ध दमन जारी रहेको भन्दै अमेरिकामा युनुस बसिरहेको होटेलअगाडि प्रदर्शन भएको हो ।

भारतीय समाचार संस्था एएनआईका अनुसार प्रदर्शनकारीले युनुसको राजीनामा माग गरेका छन् । युनुसले अवैधानिक तथा गैरसंवैधानिक हिसाबले सत्ता कब्जा गरेको प्रदर्शनकारीको आरोप छ ।

आफूहरु धर्म निरपेक्ष लोकतन्त्रको पक्षमा रहेको भन्दै प्रदर्शनकारीले हिन्दू, इसाईजस्ता धार्मिक अल्पसङ्ख्यकविरुद्ध जारी दमनको निन्दा गरेका छन् ।

अमेरिका भ्रमणमा रहँदा मोहम्मद युनुसले अमेरिका, नेदरल्याण्ड्स, पाकिस्तान, नेपालजस्ता मुलुकका सरकार तथा राष्ट्रप्रमुखसँग भेटवार्ता गरेका छन् । सरकारविरोधी आन्दोलनपछि तत्कालीन प्रधानमन्त्री शेख हसिनाले देश छाडेपछि युनुस नयाँ सरकार प्रमुख नियुक्त भएका थिए ।