काठमाडौं – असोज ११ गतेबाट प्रदर्शनको तयारीमा रहेको फिल्म ‘सानो संसार’को गीत ‘मग मग फूलबारी’ सार्वजनिक भएको छ । काठमाडौंमा सोमबार एक कार्यक्रम गरी निर्माण पक्षले गीत सर्वाजनिक गरेको हो ।

गीतमा राजनराज सिवाकोटी र मेलिना राईले स्वर दिएका छन् । गीतको शब्द र संगीत सिवाकोटीकै हो । विवाहको सेटअपमा तयार पारिएको सो गीतमा फिल्मका मुख्का कलाकारहरु फिचर्ड छन् । भिडियोमा सुजैन खड्का र मनोज खड्काको कोरियोग्राफी हेर्न सकिन्छ ।

पारिवारिक कथावस्तुमा निर्माण भएको सिनेमामा हास्य कलाकार केदार घिमिरे ‘माग्नेबुढा’की श्रीमती सीतादेवी तिमल्सेनाको मुख्य भूमिका छ ।

फिल्ममा सीतासहित राज पंगेनी शर्मा, अनु दाहाल, अन्जसा रिजाल शिशिर सिवाकोटी, सरिता भण्डारी र जीवन गौतमको अभिनय छ ।

यो फिल्मको प्रदर्शन मिति केही दिनअघि हेरफेर गरिएको हो । पहिला प्रदर्शन मिति असोज १७ गतेलाई तोकिएको थियो ।

राजधानी मिडिया एड प्रोडक्सन र प्रिन्सेस मूभिजको ब्यानरमा यो फिल्म बनेको हो । यसको सह-निर्माता अर्जुन कुमार र कार्यकारी निर्माता माधव वाग्ले हुन् ।

सिद्धार्थ पुडासैनीले फिल्मको निर्देशन गरेका हुन् । यही सिनेमाबाट उनले लेखन तथा निर्देशनमा डेब्यू गरेका हुन् । उनलाई कथा लेखनमा सरिष्मा खत्रीले सघाएकी छन् ।