काठमाडौं- नेपाली कांग्रेसका नेता रामहरि खतिवडाले प्रतिनिधिसभामा नेकपा माओवादी केन्द्रका अध्यक्ष पुष्पकमल दाहाल प्रचण्डको अभिव्यक्ति सत्ताबाहिर रहँदाको आक्रोश भएको टिप्पणी गरेका छन् ।

मंगलबार संसद् भवनमा सञ्चारकर्मीसँग कुरा गर्दै खतिवडाले सत्ता छाड्दाको पीडाले प्रचण्डले सदनमा आक्रोशपूर्ण अभिव्यक्ति दिएको टिप्पणी गरेका हुन् ।

त्यसक्रममा संविधानका सबै कुरा मान्न तयार रहेको भन्ने अभिव्यक्ति सकारात्मक पक्ष भएको उनले बताए ।

त्यस्तै खतिवडाले सार्वजनिक लेखा समिति प्रतिपक्षीले पाउने अधिकार रहे पनि यसअघिका नजिर हेर्नुपर्ने बताए ।

खतिवडाले प्रयोग गरिएका विद्युत् महशुल तिर्नैपर्ने उल्लेख गरे। यसमा देखिएको विवादलाई मन्त्रिपरिषदले निर्णय गरेर हल गर्नुपर्ने उनले सुझाव दिए ।

विभिन्न आयोगहरूका सुझाव प्रतिवेदनलाई आधारमा मानेर विद्युत् महशुलबारे सरकारले आवश्यक निकास निकाल्नुपर्ने उनले बताएका छन् ।