काठमाडौं– पाकिस्तानको पेशावर शहर सुरक्षाको दृष्टिले निकै जोखिमपूर्ण र संवेदनशील मानिन्छ । लडाकु समूहको बाक्लो उपस्थिति रहेको खैबर पख्तुनख्वा प्रान्तको राजधानी पेशावरमा हिंसात्मक अपराधका घटना पनि बारम्बार दोहोरिने गरेको छ ।

तर, यो पेशावर शहरका आधाजति प्रहरी उच्च पदस्थ व्यक्तिको सुरक्षामा मात्रै खटिने गरेको पाइएको छ ।

पाकिस्तानको एक्सप्रेस ट्रिब्युन अखबारका अनुसार पेशावर शहरका ३५ चौकीमा कुल ९ हजार प्रहरी तैनाथ छन् ।

तीमध्ये आधा अर्थात् ४५ सय जना त अतिविशिष्ट, विशिष्ट व्यक्ति, जनप्रतिनिधि, संवेदनशील भवन र विदेशी नियोग र सरकारी भवनको सुरक्षामा मात्रै तैनाथ हुने गरेका छन् । बाँकी ४५ सयजना प्रहरीले ५० लाख जनताको सुरक्षा गर्नुपर्ने बाध्यता रहेको ट्रिब्युनले जनाएको छ । फलस्वरुप शहरमा अपराधका घटना पनि बढ्दै गएको पाइएको छ ।

पछिल्लो समय शहरमा हरेक साता दिनदहाडै चोरीका १४० देखि १७५ वटा घटना दर्ता हुने गरेको छ । त्यसबाहेक यो वर्षमात्रै शहरमा ३ सय ३८ जनाको हत्या भइसकेको छ । ५१ जनालाई अपहरण गरिएको वा बेपत्ता पारिएको छ ।

सुरक्षा अधिकारीले भने उच्च पदस्थ व्यक्ति तथा संवेदनशील भवनको सुरक्षाका लागि छुट्टै सुरक्षा एकाइ बनाउने योजनाअघि सारिएको बताएका छन् । यसबाट प्रहरीमाथिको दबाब केही कम हुने अपेक्षा गरिएको छ ।