काठमाडौं– प्रमुख प्रतिपक्षी नेकपा (माओवादी केन्द्र) का अध्यक्ष एवम् पूर्वप्रधानमन्त्री पुष्पकमल दाहाल ‘प्रचण्ड’ले आफू अब सत्ताको खेलमा नलाग्ने, बरु माओवादी एक्लैले सरकारको नेतृत्व गर्ने तहमा पार्टी पुनःगठन गर्ने बताएका छन् ।
वर्तमान सत्तारुढ प्रमुख दल नेपाली कांग्रेस र नेकपा (एमाले) लाई बीचैमा झगडा गरेर ‘लौ न प्रचण्डजी’ भन्दै फकाउन र फुर्क्याउन चाहिँ नआइदिन पनि दाहालले संसद्बाटै ‘अनुरोध’ गरे ।
मंगलबार दिउँसो बसेको प्रतिनिधि सभा बैठकलाई सम्बोधन गर्दै सरकारप्रति आक्रोश पोखेका दाहालले वर्तमान सत्ता गठबन्धनको भविष्यप्रति शङ्का बढाउँदै भने, ‘कांग्रेस एमालेका साथीहरूलाई म यही रोष्टमबाट आग्रह गर्छु- प्रचण्ड अब सत्ताको खेलमा लाग्नेछैन । तपाईंहरूकहाँ सत्ताको हिस्सेदारी माग्न आउने छैन ।’
दाहालले थपे, ‘हाम्रो ध्यान आन्दोलनको पुनःगठनमा छ । त्यही पुनःगठनको बलमा हामी भोलि माओवादी एक्लैले सरकारको नेतृत्व गर्ने तहमा पार्टी बनाउँछौं । पहिला पनि बनाएकै हौँ, अब पनि बनाउँछौँ । त्यतिबेलासम्म कृपया तपाईंहरू दुईवटा पार्टी मिलिराख्नुहोला । फेरि बीचैमा झगडा गरेर ‘लौ न प्रचण्डजी’ भन्दै फकाउन र फुर्क्याउन चाहिँ नआइदिनुहोला ।’
दाहालको सम्बोधन सुनिरहेका प्रधानमन्त्री केपी शर्मा ओली ।
प्रमुख प्रतिपक्षी दलका नेतासमेत रहेका दाहालले यसबीच आफूहरू (माओवादी नेता/कार्यकर्ता)ले तीन कमजोरी गरेको पनि बताए । जनतासँग सम्वाद, व्यवहार र वर्गीय पक्षधरतामा कमजोरी भएको उनको भनाइ थियो ।
‘म यही संसद्बाट स्वीकार गर्छु- यसबीच हाम्रा केही कमजोरी भए । जनतासँग सम्वादका कमजोरी भए, व्यवहारका कमजोरी भए, वर्गीय पक्षधरतामा कमजोरी भए,’ दाहालले भने ।
राजनीतिक सहमति पालना नगरेको भनी लाग्ने गरेको आरोपमा दाहालले नेपालको इतिहासमा सत्ताको वितरणको राजनीतिक सम्झौता केवल एकपटकमात्र र केवल एक व्यक्तिले मात्र पालना गरेको तथा त्यो व्यक्ति आफू अर्थात् पुष्पकमल दाहाल ‘प्रचण्ड’ नै भएको पनि दाबी गरे ।
उनले सत्तारुढ दलहरू माओवादीको कमजोरीमा खेलेर सीमान्त वर्गका प्राप्त अधिकार खोस्न चल्मलाउन खोजेको आरोप पनि लगाए । भने, ‘माओवादी कमजोर भयो कि भनेर विभिन्न खालका चलखेल गर्दै हुनुहुन्छ । समापन भइसकेको राजनीतिक क्रान्तिको दस्तावेज फेरि उल्ट्याउने प्रयास गर्दै हुनुहुन्छ ।’
माओवादीको ध्यान अब सत्तामा नरहेको र सत्तारुढ दलले गर्ने चलखेलको प्रतिरोध गर्ने कुरामा केन्द्रित भएको पनि दाहालको दाबी छ ।
प्रतिक्रिया