काठमाडौं- आज टी २० विश्व कप २०२४ को दोस्रो सेमिफाइनलमा भारत र साविक विजेता इङ्ल्यान्ड आमनेसामने हुँदैछन् ।

यो खेल गुयानाको प्रोभिडेन्स स्टेडियममा हुन लागेको छ । भारतीय टोली जारी प्रतियोगितामा अपराजित हुँदै सेमिफाइनलमा पुगेको छ ।

उता इङ्ल्यान्ड समूह चरणमा अस्ट्रेलिया र सुपर-८ मा दक्षिण अफ्रिकासँग हारेको छ ।  आज राति सवा ८ बजे हुने खेलका लागि रिजर्भ डे राखिएको छैन । तर यो महत्वपूर्ण भिडन्तमा वर्षा बाधक बन्न सक्ने छ ।

भारतका पूर्व क्रिकेटर तथा कमेन्टेटर दिनेश कार्तिकले आफ्नो एक्स अकाउन्टमा वर्षाका कारण मैदानको अवस्था राम्रो नभएको जनाएका छन् ।

‘अहिले अवस्था राम्रो छैन । जब हामी बाटोमा थियौँ, त्यसबेला भारी वर्षात् भएको थियो । अहिले पनि स्टेडियम क्षेत्रमा सामान्य पानी परिरहेको छ । तर राम्रो खबर भनेको बादलबीच घाम पनि लागिरहेको छ ।’

सन् २०१४ यता भारत पहिलो उपाधिको खोजीमा छ । यो विश्वकपसँगै भारतका कयौँ स्टार खेलाडीहरू बिदा हुँदैछन् । यस पटक भारत उपाधिको लामो खडेरी तोड्न फाइनल यात्रा तय गर्ने दाउमा छ ।

भारतका लागि गर या मरको अवस्थामा रहेको यो खेलले सन् २०२२ को सेमिफाइनल याद दिलाउँछ । त्यसबेला भारतलाई इङ्ल्यान्डले हराएको थियो ।

वर्षाबीच पनि भारत र इङ्ल्यान्डका हजारौँ दर्शक स्टेडियम पुग्दैछन् । गुयानाको प्रोभिडेन्स स्टेडियममा हुन लागेको यो खेलको विजेताले आगामी जुन २९ मा उपाधिका लागि दक्षिण अफ्रिकासँग खेल्ने छ ।