काठमाडौं– जर्मनीमा जारी १७औँ संस्करणको युरोकप फुटबलमा रोमानिया अन्तिम १६ मा प्रवेश गरेको छ।

गएराति भएको समूह ‘ई’ को खेलमा स्लोभाकियासँग १–१ गोलको बराबरी खेल्दै रोमानिया अन्तिम १६ मा पुगेको हो ।

रोमानियाका रजवान मारिन र स्लोभाकियाका ओन्द्रेज डुडाले एक–एक गोल गरेका थिए ।

खेलको २४औँ मिनेटमा स्लोभाकियाका डुडाले सुरुवाती गोल गरेका थिए । तर ३७औँ मिनेटमा मारिनले गोल गर्दै रोमानियालाई १–१ गोलको बराबरी ल्याए ।

त्यसपछि थप गोल नभएपछि दुवै टोली १–१ गोलको बराबरी खेल्दै अंक बाँड्न बाध्य भए ।
तीन खेलबाट चार अंक जोडेको रोमानिया शीर्षस्थानमा रहँदै अन्तिम १६ मा प्रवेश गरेको छ । चार अंक नै भएको स्लोभाकिया गोल अन्तरका आधारमा तेस्रो स्थानमा छ ।

यस्तै, बेल्जियम र युक्रेन पनि समान ४ अंकसहित क्रमशः दोस्रो र चौथो स्थानमा छन् ।