काठमाडौं – प्रमुख प्रतिपक्ष नेपाली कांग्रेसका सांसद दिलेन्द्रप्रसाद बडूले सांसद विनोद चौधरीमाथि छानबिन गर्दैछौं भनेर सभामुखलाई पत्र लेख्नुको कारण उपप्रधानमन्त्री तथा गृहमन्त्री रवि लामिछानेसँग माग गरेका छन् ।

प्रतिनिधिसभाको राज्य व्यवस्था तथा सुशासन समितिको बैठकमा बोल्दै सांसद बडूले संविधानको धारा १०३ मा उल्लेख भए बमोजिम मात्र सभामुखलाई जानकारी गराउने संवैधानिक व्यवस्था रहेको बताए । तर सांसद चौधरीको हकमा छानबिन गर्दैछौं भनेर पत्र पठाएर चौधरीको ह्यारेसमेन्ट गर्न खोजिएको हो की भन्ने विषय उठेको भन्दै उनले पूर्वाग्रह राखेर चौधरीमाथि यस्तो गरिएको हुनसक्ने आशंका व्यक्त गरे । चौधरी नेपाली कांग्रेसबाट निर्वाचित सांसद हुन् ।

समिति बैठकमा बोल्दै सांसद बडूले उपप्रधान तथा गृहमन्त्री लामिछानेलाई सहकारी प्रकरणको छानबिन अवधिभर राजीनामा दिन आग्रह गरे ।

उनले छानबिनको निष्पक्षताका लागि गृहमन्त्री नै रवि लामिछाने हो भने जनताले विश्वास दिलाउनका लागि छानबिन अवधिमा बाहिर बस्न आग्रह गरेका हुन् ।

सहकारीको एक करोड जम्मा भएका रवि लामिछाने गृहमन्त्री नै हो कि अरू कोही हो ? भन्दै प्रश्न पनि गरे ।