पोखरा- चीनबाट एउटा चार्टर्ड विमान पोखरा अन्तर्राष्ट्रिय विमानस्थलमा अवतरण गरेको । सिचुआन एअरलाइन्सको विमान बिहान पौने १० बजे पोखरा विमानस्थलमा अवतरण गरेको हो ।

उक्त विमानमा आगामी आइतबारदेखि हुन लागेको अन्तर्राष्ट्रिय ड्रागन डुंगा दौड प्रतियोगिता २०२४ मा सहभागी हुने प्रतियोगीलगायत सरकारी तथा गैरसरकारी अधिकारी, सञ्चारकर्मी आएका छन् ।

आयोजक संस्थाका तर्फबाट शनिबार साँझ पोखरा इभेन्ट सेन्टरमा सहभागीहरूको सम्मानमा रात्रिभोज आयोजना गरिँदै छ ।

ड्रागन बोट फेस्टिभलको दोस्रो संस्करणमा नेपालबाट ११ समूह, चीनबाट ८ र सिंगापुरबाट १ समूह गरी २० समूहमा भाग लिँदैछन् ।

२ सय मिटर र ५ सय मिटर दूरीमा आयोजना गरिने प्रतियोगितामा दुवै दुरीका प्रथम हुने विजेता समूहले ५ हजार अमेरिकी डलर, उपविजेताले २ हजार डलर र तृतीयले १ हजार २ सय डलर पुरस्कार पाउने छन् । सहभागी बाँकी १७ समूहलाई प्रतिसमूह ५ सय डलर दिइनेछ।

आइतबार बिहान ९ बजे लेक साइडमा अन्तर्राष्ट्रिय डुंगा दौड प्रतियोगिता २०२४ को औपचारिक सुरुवात हुँदैछ । प्रतियोगिताअन्तर्गत बिहान पौने १० बजे २०० मीटर र ११ बजे पाँच सय मिटर सोझो डुंगा दौड हुनेछ ।

सोमबार बिहान साढे ९ बजेबाट २०० मिटरको सेमिफाइनल र १० बजे फाइनल दौड हुने छ ।

साढे १० बजे पाँच सय मिटरको सेमिफाइनल, सवा ११ बजे पाँच सय मिटरको फाइनल र पौने १२ बजे पुरस्कार तथा समापन समारोह आयोजना गरिने छ ।