इस्लामावाद- पाकिस्तानमा राजनीतिक संकट गहिरिँदै गएको छ । इमरान खान नेतृत्वको तहरिक-ए-इन्साफ (पीटीआई) का कार्यकर्ताहरू लाखौंको संख्यामा इस्लामावाद आइपुगेका छन् ।

उनीहरूले पूर्वप्रधानमन्त्रीसमेत रहेका इमरान खानको रिहाईको आवाजलाई जोडदार रुपमा चर्काएका छन् ।

पीटीआईका कार्यकर्ताहरू जेल थुनिएका पूर्वप्रधानमन्त्री खानको रिहाई माग गर्दै तीन दिनदेखि अर्को आन्दोलनमा होमिएका हुन् ।

सोमबार मात्रै पीटीआईका कार्यकर्ताको लस्कर इस्लामाबादको सीमाक्षेत्रमा पुगिसकेको छ । प्रदर्शनकारीलाई रोक्नका लागि सुरक्षाको कडा व्यवस्था गरिएको छ ।

प्रदर्शनकारीहरूको लक्ष्य इस्लामाबादको डी-चोकमा जम्मा हुनु रहेको छ ।

इस्लामाबाद प्रशासनले पाकिस्तानको संविधानको अनुच्छेद २४५ अन्तर्गत कानुनी व्यवस्था कायम गर्न सेनालाई बोलाएको छ ।

यस कुराको पुष्टि इस्लामाबादका उप-कमीश्नर इरफान मेमनले बीबीसीसँग गरेका छन् ।

यसै वर्ष जनवरीमा इस्लामाबादको एक अदालतले इमरान खान र उनकी श्रीमतीलाई तोशाखाना मामिलामा १४ वर्षको जेल सजाय सुनाएको छ ।

यसका अलाव इमरानलाई २० लाख पाकिस्तानी रुपैयाँ जरिवाना पनि गराइएको थियो। पाकिस्तानमा यसैवर्ष भएको चुनावअघि पीटीआईलाई प्रतिबन्ध गरिएको थियो।

तर पीटीआईले आफ्नो समर्थनमा देशभर स्वतन्त्र उम्मेदवार खडा गर्दा ९३ सीटमा जित निकालेको थियो। यसका बावजुद पाकिस्तानमा इमरानको जेल बसाई लम्बिएको छ ।