काठमाडौं– प्रमुख प्रतिपक्षी नेकपा माओवादी केन्द्रका उपाध्यक्ष नारायणकाजी श्रेष्ठले सरकार जनताको हितविपरीतका गतिविधि गरिरहेकाले पार्टीले खबरदारी सभा आयोजना गरेको बताएका छन् । 

काठमाडौंको प्रदर्शनी मार्गमा जारी खबरदारी सभा सम्बोधनका क्रममा उनले सरकारका जनहितविपरीतका गतिविधि रोक्न माओवादीले खबरदारी सभा आयोजना गरेको बताए ।

उपाध्यक्ष श्रेष्ठले सत्तारुढ पार्टीहरू, ती पार्टीका नेताहरू र सरकार निजी स्वार्थ केन्द्रित र भ्रष्टाचारको प्रक्रियालाई अगाडि बढाउने काममा लागेको पनि आरोप लगाए ।

‘खबरदारी सभा सत्तारुढ पार्टीहरू, तीनका नेताहरू र सरकार पार्टीहित केन्द्रित, निजी स्वार्थ केन्द्रित र भ्रष्टाचारको प्रक्रियालाई अगाडि बढाउने, कुशासनको प्रक्रियालाई अगाडि बढाउने देश, जनताको हितविरुद्धको गतिविधि गरिरहेको परिप्रेक्ष्यमा त्यसको विरुद्ध जनदवाव दिन र त्यसलाई रोक्न र असफल पार्न आज हामीले विशाल खबरदारी सभा आयोजना गरेका हौँ,’ उनले भने ।

 उपाध्यक्ष श्रेष्ठले सरकारको भ्रष्टाचारविरुद्धको अभियान रोकेर भ्रष्टाचारी जोगाउन कांग्रेस–एमालेले प्रचण्ड नेतृत्वको सरकार ढालेको दाबी गरे । 

‘भ्रष्टाचारविरुद्धको अभियनलाई रोक्न, भ्रष्टाचारीहरूलाई जोगाउन र आफूलाई भ्रष्टाचार गर्ने थलो पाउँ भनेर हाम्रो सरकार ढालेर यो सरकार खडा गरिएको त प्रष्ट नै छ,’ उनले भने ।