काठमाडौं – नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफ्नो पार्टीले नेतृत्व गरेको सरकारले नेपालमा सुशासनको सवालमा ऐतिहासिक रेकर्ड बनाएको उल्लेख गर्दै यसलाई कसैले मेटाउन नसक्ने दाबी गरेका छन्‌ ।

माओवादी केन्द्र बागमती, उपत्यका विशेष र सम्पर्क समन्वय प्रदेश समितिले काठमाडौंमा आयोजना गरेको खबरदारी सभालाई सम्बोधन गर्दै दाहालले सुशासन, सामाजिक न्याय र आर्थिक समृद्धिको पक्षमा थालेको अभियानले नेपालकै लागि पहिलो रेकर्ड बनाएको बताए । ।

नक्कली भूटानी शरणार्थी प्रकरणका अभियुक्त पक्राउ गरेपछि अत्तालिएर सरकार ढालिएको तर्क गर्दै दाहालले अहिलेको सरकार भ्रष्टाचारीलाई बचाउनकै लागि बनेको बताए ।

उनले चार दिनको तयारीले गरेको खबरदारी सभाले सरकार तर्सेको उल्लेख गर्दै भोलि ठूलै विरोध सभाको तयारी गरे सरकारको हालत के होला भनेर प्रश्न गरे । प्रचण्डले आफूहरूले जनताका मुद्दालाई ज्ञापनपत्रको रुपमा प्रस्तुत गरेको उल्लेख गर्दै त्यसलाई गम्भीरतापूर्वक नलिए आन्दोलन चर्किंदै जाने पनि बताए ।

बाढीपहिरो पीडितलाई राहत, उद्धार र पुनःस्थापना गर्ने तथा आफूहरूले थालेको सुशासनको अभियान, ऊर्जा क्षेत्रमा गरेको क्रान्ति, शैक्षिक क्षेत्रमा लागु गरेको मेरिटोक्रेसी आदि कामलाई सरकारले अगाडि नबढाए आन्दोलन अघि बढाउने चेतावनी पनि दाहालले दिएका छन्‌ ।