चितनव- नारायणगढ-मुग्लिन सडक दिनदिनै यात्रुका लागि जोखिमपूर्ण बन्दै गएको छ।

लगातार भइरहेका दुर्घटना र पहिरोका कारण यो एसियन हाइवेअन्तर्गतको यो खण्डमा ज्यानको माया मारेर यात्रा गर्नुपर्ने बाध्यता भएको छ ।

आइतबार मात्रै मुग्लिङ-नारायणगढ सडकखण्डको घुमाउनेमा बस दुर्घटनामा परेको घटना सेलाउन नपाउँदै सोमबार अर्को बस क्षतिग्रस्त भएको छ ।

आइतबार महेन्द्रनगरबाट काठमाडौँ आउँदै गरेको सुदूरपश्चिम ०१-००-२-१३३२ नम्बरको बस दुर्घटना हुँदा १५ यात्रु घाइते भएका थिए ।

बस अनियन्त्रित भएर सडक किनारमा दुर्घटनामा परेको थियो । तर सडकको तल्लोतर्फ बलियो पर्खाल रहेकाले बस त्रिशूलीमा झर्न पाएन ।

आइतबारको घटना सेलाउन नपाउँदै सोमबार पोखराबाट वीरगञ्ज जाँदै गरेको एउटा बसमा माथिबाट ठूलो ढुंगो खसेको छ ।

ग २ ख १३६७ नम्बरको बसमा यो सडकखण्डको पाँचकिलोमा माथिबाट ढुङ्गा खसेर लागेको हो । त्यसक्रममा एकजना जना भएका उक्त बसमा सवार मनोज घिमिरे क्षत्रीले बताएका छन् ।

ढुंगाले लागेपछि बसको अघिल्लो भाग क्षतिग्रस्त भएको छ । बसको अगाडिको भागको शिशा पूरै फुटेको छ । बसमा झरेको ढुंगो चालकनजिकै खसे पनि मानवीय हताहती हुन पाएन ।

बसमा क्षति पुगेपछि सबै यात्रुलाई झारेर अर्कोमा पठाइएको छ । नाम, ठेगाना खुल्न नसकेका चालकलाई उपचारका लागि नारायणगढ पठाइएको प्रहरीले जनाएको छ ।