बुटवलस्थित सुप्रिम सहकारीको बचत हिनामिना प्रकरणमा पक्राउ परेका नेकपा मा‌ओवादी केन्द्रनिकट अखिल क्रान्तिकारीका महासचिव दीपेश पुन धरौटी बुझाएर छुटेका छन् ।

सुप्रिम सहकारीको तत्कालीन कोषाध्यक्षसमेत रहेका पूर्व उपराष्ट्रपति नन्दबहादुर पुन पुत्र दीपेश बिहीबार जिल्ला अदालत रुपन्देहीमा ४ लाख धरौटी बुझाएर छुटेका हुन् । जिल्ला अदालत रुपन्देहीका सूचना अधिकारी अनन्तराज मरासिनीले ४ लाख धरौटी लिएर पुनलाई तारखेमा रिहा गरिएको बताए ।

उनलाई जिल्ला अदालत रुपन्देहीले धरौटीमा छाड्ने आदेश दिएकाे थियो । तर फेरि पक्राउ पर्ने डरले उनी धरौटी नबुझाइ कारागारमा बसेका थिए ।

सहकारी प्रकरणमा छुटे पनि पुनमाथि नेपाल प्रहरीको केन्द्रीय अनुसन्धान ब्युरो (सीआईबी) ले सुन तस्करी प्रकरणमा छानबिन गर्ने भएको छ ।

धरौटी बुझाउँदै तारेखमा रिहा भएका उनलाई उपयुक्त समयमा बयानका लागि बोलाउने तयारी भइरहेको सीआईबीले जनाएको छ ।

सीआईबीका प्रवक्ता एसपी होविन्द्र बोगटीले पुनमाथि सुन तस्करी प्रकरणमा पनि अनुसन्धान भइरहेकाले उचित समयमा बयानका लागि बोलाउने जानकारी दिए ।

‘अहिले उनलाई पक्राउ गरिएको छैन, हामी अनुसन्धानको चरणमा छौँ’, उनले खबरहबसँग भने, ‘अनुसन्धानका क्रममा उचित समयमा झिकाएर बयान लिन्छौँ, सोधपुछ हुनेछ ।’

पुनलाई जिल्ला अदालत रुपन्देहीले गत वैशाख ७ गते नै धरौटीमा छाड्न आदेश दिएको थियो । तर त्यसबेला फेरि पक्राउ पर्ने चिन्ताले उनी धरौटी नबुझाई कारागार गएका थिए ।