काठमाडौं– नेपाली कांग्रेसका महामन्त्री गगन थापाले राजनीतिमा इमान र योग्यता भएको मान्छको अभाव भएको बताएका छन् ।

कांग्रेस नेता नवीन्द्रराज जोशीको तेस्रो स्मृति दिवसका अवसरमा मंगलबार काठमाडौंमा आयोजित कार्यक्रममा थापाले राजनीतिमा छट्टुहरु हावी हुन थालेको भन्दै इमान्दारसंगै योग्यताका निम्ति प्रयास गर्ने मानिस चाहिएको बताए ।

उनले छट्टुहरु केही समयका लागि आउने झुक्काउने र रङ्गरोगन गरेर जाने भएकाले गति र मति भएकाहरूको राजनीतिमा आवश्यकता देखिएको धारणा राखे । 

अहिले घरभित्रको फोहरहरूलाई सफा बनाएर ठिक ढंगले लय पक्रनुपर्ने उनले बताए । महामन्त्री थापाले नयाँ पुस्ताले चाँडोभन्दा चाँडो परिवर्तन होस् भन्ने चाहनालाई उत्तेजनाको राजनीति गर्नेहरूले दूरुपयोग गरेको धारणा राखे । उनले नेपाली राजनीति र समाज रूपान्तरणमा स्वर्गीय नेता जोशीले खेल्नुभएको भूमिकाको चर्चा गरे ।

त्यस्तै कांग्रेसका नेता प्रदिप पौडेलले अहिलेको गठबन्धन चीरस्थायी नहुने भन्दै आफूभित्रको झगडाले समाप्त हुने दावी गर्नुभयो । अहिले जसरी सत्ता चाहिने प्रवृत्तिलाई अन्त्य गर्नका लागि फरक ढंगले संगठीत हुन जरुरी रहेको उनले बताए ।