काठमाडौं – सोमबार आयरल्यान्ड ‘ए’ विरुद्ध टी-२० सिरिजको पहिलो खेलमा विजयी भएको नेपालले आज दोस्रो खेल खेल्दैछ। खेल कीर्तिपुरस्थित त्रिभुवन विश्वविद्यालय मैदानमा मंगलबार दिउँसो १ बजे सुरु हुनेछ। दुई खेलको सिरिजमा नेपाल १-० ले अगाडि छ। आज दोस्रो अर्थात् अन्तिम सिरिज हुन लागेको हो।
सोमबार भएको पहिलो खेलमा नेपालले आयरल्याण्ड वोल्भ्सलाई पराजित गरेको हो। आयरल्याण्ड वोल्भ्सले दिएको १२२ रनको लक्ष्य पछाएको नेपालले १६.१ ओभरमा ४ विकेट गुमाउँदै लक्ष्य पुरा गरेको थियो।
नेपालको जितमा सन्दीप जोराले ३६ रन बनाएका थिए भने कुशल भुर्तेलले अविजित ३७ रन बनाए। त्यस्तै आसिफ सेखले १६ रन बनाएका थिए भने दिपेन्द्र सिंह ऐरीले अविजित २० रन बनाए। गुल्सन झाले चार रन जोडे भने कप्तान रोहित पौडेल शुन्यमा आउट भएका थिए।
त्यसैगरी ग्यारेथ डेलानीले २ विकेट लिएका थिए भने बेन ह्वाइट र थोमस मायेसले एक एक विकेट लिएका थिए। यसअघि टस जितेर पहिला ब्याटिङ गरेको आयरल्याण्ड वोल्भ्सले २० ओभरमा अल आउट हुँदै १२१ रन बनाएको थियो।
आयरल्याण्ड वोल्भ्सका लागि स्टेफेन डोहेनीले सर्वाधिक ४६ रन बनाएका थिए भने थोमस मायेज र लियाम म्याकार्थीले १६-१६ रन बनाएका थिए।
त्यसैगरी नेपालका ललित राजवंशी, गुलशन झा र कुशल भुर्तेलले २-२ विकेट लिए भने करण केसी र कुशल मल्लले एक एक विकेट हात पारे।
नेपाल ‘ए’ सँग टी-२० र एक दिवसीय सिरिज
आयरल्याण्डसँग नेपाल ‘ए’ टिमले तीन-तीन खेलको टी-२० र एक दिवसीय सिरिज खेल्दैछ। यो सिरिज बिहीबारदेखि सुरु हुनेछ। आयरल्यान्डसँग खेल्ने टी-२० र एक दिवसीय सिरिजका लागि नेपाल ‘ए’ टोलीको घोषणा भइसकेको छ।
नेपाल क्रिकेट सङ्घ (क्यान) ले आइतबार विनोद भण्डारीको कप्तानीमा दुवै खेलका लागि टोलीको घोषणा गरेको हो।
नेपाल ‘ए’ ले कीर्तिपुरस्थित त्रिवि मैदानमा आयरल्यान्डसँग यही मार्च २८, २९ र ३० तारिख (चैत १५, १६ र १७ गते) टी-२० र अप्रिल ३, ५ र ७ तारिख (चैत २१, २३ र २५ गते) एक दिवसीय सिरिज खेल्न लागेको हो।
यो पनि पढ्नुहोस्
प्रतिक्रिया