काठमाडौं – चालु आर्थिक वर्षको पहिलो महिना साउनमा आयात-निर्यात दुबै खुम्चिएको छ । आयात ०.६ र निर्यात ९.६ प्रतिशतले घटेको हो ।

नेपाल राष्ट्र बैंकले सार्वजनिक गरेको ‘देशको वर्तमान आर्थिक तथा वित्तीय स्थिति’ प्रतिवेदनमा उल्लेख भएअनुसार विप्रेषण आप्रवाह भने नेपाली रुपैयाँमा १८ प्रतिशतले बढेको छ ।

वार्षिक बिन्दुगत आधारमा उपभोक्ता मूल्य सूचकाङ्कमा आधारित मुद्रास्फीति ४.१० प्रतिशत रहेको छ । शोधनान्तर स्थिति ४० अर्ब ९० करोड रुपैयाँले बचतमा छ ।

चालु आर्थिक वर्षको पहिलो महिनामा कुल विदेशी विनिमय सञ्चिति २० खर्ब ९२ अर्ब २२ करोड र अमेरिकी डलरमा १५ अर्ब ५८ करोड रहेको केन्द्रीय बैंकले जानकारी दिएको हो ।

साउनमा सरकारको खर्च ४० अर्ब २१ करोड र राजस्व परिचालन ९४ अर्ब ७४ करोड रुपैयाँ भएको प्रतिवेदनमा उल्लेख छ । सर्वसाधारणसँग भएको नगद, बैंक तथा वित्तीय संस्थामा कायम रहेको चल्ती निक्षेप, बैंक तथा वित्तीय संस्थामा कायम रहेको आवधिक निक्षेपको कूल योग अर्थात्‌ विस्तृत मुद्राप्रदाय ०.७ प्रतिशतले घटेको छ ।

बैंक तथा वित्तीय संस्थाको निक्षेप संकलन ०.७ प्रतिशतले घटेको र निजी क्षेत्रमा प्रवाहित कर्जा ०.३ प्रतिशतले बढेको तथ्याङ्क केन्द्रीय बैंकले पस्किएको छ ।

वार्षिक बिन्दुगत आधारमा निक्षेपको वृद्धिदर १४.९ प्रतिशत र निजी क्षेत्रमा प्रवाहित कर्जाको वृद्धिदर ६.२ प्रतिशत छ ।