पोखरा– राष्ट्रिय स्वतन्त्र पार्टी (रास्वपा)ले पोखराको सहिदचोक लगायत क्षेत्रलाई निषेधित क्षेत्र हटाउन माग गरेको छ ।

मंगलबार रास्वपाका नेताहरूले कास्कीका प्रमुख जिल्ला अधिकारीलाई भेटेर पोखराको सहिदचोक, लेकसाइडलगायत क्षेत्रमा दुई महिनादेखि जारी निषेधित क्षेत्र हटाउन जिल्ला प्रशासन समक्ष माग गरेको हो ।

रास्वपाले इसायी धर्मालम्बीहरुको विशेष पर्व क्रिसमस र अंग्रेजी नयाँ वर्षका अवसरमा पोखरा आउने पर्यटकलाई समस्या हुने भएकाले निषेधित क्षेत्र हटाउन माग गरेको हो ।

पार्टी सभापति रवि लामिछानेलाई गत कात्तिक २ गते काठमाडौंबाट पक्राउ गरी पोखरा लगिएपछि कत्तिक ३ गतेबाट जिल्ला प्रशाासन कार्यालय कास्कीले पोखराको सहिदचोकदेखि लेकसाइडको स्ट्रिट–१ सम्मको क्षेत्रलाई निषेधित घोषणा गरेको थियो ।

यस्तै लेकसाइड प्रवेशको मुख्यमार्गमा दुई महिनाभन्दा बढी समयदेखि निषेधित क्षेत्र कायम रहँदा पर्यटकको आवागमन तथा व्यापार व्यवसायमा असर परिरहेको रास्वपाले उल्लेख गरेको छ ।