काठमाडौं- सुनसरीको धरान उपमहानगरपालिकाका मेयर हर्क साम्पाङ काठमाडौंको कीर्तिपुर नगरपालिकामा भइरहेको उपनिर्वाचनमा स्वतन्त्र उम्मेदवारलाई भोट माग्न आइपुगेका छन् ।

यही मंसिर १६ गते हुन लागेको कीर्तिपुर नगरपालिकाको मेयर पदको उपनिर्वाचनमा साम्पाङले स्वतन्त्र उम्मेदवार राजमान महर्जनलाई समर्थन गर्दै भोट मागिरहेका छन् ।

सोमबार काठमाडौं आइपुगेका साम्पाङले महर्जनलाई भोट दिन आग्रह गर्दै घरदैलो गरिरहेका छन् ।

आफू जस्तै काममा विश्वास गर्ने मान्छे कीर्तिपुरमा देखेपछि महर्जनलाई समर्थन गर्न आइपुगेको साम्पाङले बताए ।

कीर्तपुरका सरसफाइ अभियन्ता महर्जनलाई समर्थन गर्दै अर्का स्वतन्त्र उम्मेदवार नरेश श्रेष्ठ पछि हटिसकेका छन् ।

मंसिर १६ गते हुने उपनिर्वाचनमा ठूला दललाई स्वतन्त्र उम्मेदवारले चुनौती दिँदैछन् । तीनजना बढी स्वतन्त्र उम्मेदवारलाई मिलेर अघि बढ्न दबाब परेको छ। कीर्तिपुरको मेयरसहित वडा नम्बर १ र ४ को वडाध्यक्षमा पनि उपनिर्वाचन हुँदैछ ।

धरानमा हर्क साम्पाङ २०७९ को स्थानीय तह निर्वाचनमा नेपाली कांग्रेस, नेकपा एमाले र नेकपा माओवादी केन्द्रकासमेत उम्मेदवारलाई हराउन सफल भएका थिए । लौरो लिएर स्वतन्त्र रुपमा उम्मेदवारी दिएका उनी आश्चर्यजनक परिणामसहित धरानको मेयर बने ।

उनले गत वैशाखमा इलाम क्षेत्र नम्बर २ मा भएको प्रतिनिधिसभाको उपनिर्वाचनमा पनि पहिचान पक्षधर स्वतन्त्र उम्मेदवार डकेन्द्र सिंह थेगिमलाई सघाएका थिए ।

तर त्यहाँ नेकपा एमालेका सुहाङ नेम्बाङ विजयी भएका थिए। हर्क साम्पाङ आफैं मुढा बोकेर भोट माग्दै हिँडे पनि थेगिमले उल्लेख्य भोट ल्याए तर जित निकाल्न सकेनन् ।