काठमाडौं–प्रभु महालक्ष्मी लाइफ इन्स्योरेन्स लिमिटेड र अपी पावर कम्पनी लिमिटेडले आर्थिक वर्ष २०८०/८१ को खुद मुनाफबाट लाभांश घोषणा गरेका छन् ।

प्रभुले वितरण योग्य मुनाफाबाट हाल कायम रहेको चुक्ता पुँजीको १० प्रतिशत बराबर बोनस शेयर र कर प्रयोजनको लागि ०.५२६ प्रतिशत गरेर जम्मा १०.५२६ प्रतिशत लाभांश घोषणा गरेको छ ।

प्रभुको जेठ ७ गते बसेको १६ औँ संचालक समितिको बैठकले उक्त लाभांश घोषणा गरेको कम्पनी सचिव किशोर प्रसाद लामिछानेले जानकारी दिए ।

अपीको ५ अर्ब ७८ करोड ६५ लाख चुक्ता पुँजीको ९ प्रतिशतले बोनस शेयर र ०.४७३७ प्रतिशत कर प्रयोजनका लागि नगद लाभांश दिने भएको हो । कम्पनीको ७ गने सबेको सञ्चालक समितिको बैठकले उक्त बोनस दिने घोषणा गरेको कम्पनी सचिव सुजन अधिकारीले बताए ।

लामिछानेका अनुसार लाभाशंसँगै प्रभुले निष्कासन गर्न लागेको हकप्रद शेयर १७ प्रतिशत बाट घटाएर ९ प्रतिशतमा झार्ने भएको छ । लाभांश वितरण गरेपछि बीमा प्राधिकरणले तोकेको ५ अर्ब पुँजी पुग्ने भएकाले हकप्रद शेयर घटाएको लामिछानेले बताए ।

लाभांश र हकप्रद निष्कासनको बारेमा बीमा प्राधिकरणलाई स्वीकृतिका लागि निवेदन दिएको र स्वीकृत पाए पश्चात् बोनस र हकप्रद जारी गर्ने सचिव लामिछानेले बताए ।