दोलखा– दोलखाको वैतेश्वर गाउँपालिकाले वडागत रूपमा नेपाल सरकारले उपलब्ध गराउँदै आएको सामाजिक सुरक्षाभत्ता वितरण गर्दै आएको छ ।

गाउँपालिका तथा वडाले स्थानीय बैंक सँग समन्वय गरेर वडाबाटै जेष्ठ नागरिकहरूको सहजताको लागि प्रत्येक वडामा घुम्ती शिविर कार्यक्रम मार्फत गाउँपालिका भित्रका ८ वडामा वैशाख ७ गतेदेखि भत्ता वितरण गर्न सुरु गरेको वैतेश्वर गाउँपालिकाले जनाएको छ।

पालिकाले गत शुक्रबार वडा नम्बर-८ बाट सुरु गरेको भत्ता वितरण कार्यक्रम अन्तिम चरणमा पुगेको जनाएको छ। गाउँपालिकाले वडामै सुरक्षाकर्मी, बैंक कर्मचारी तथा पालिकाको कर्मचारीहरूको उपस्थितिमा चालु वर्षको तेस्रो त्रैमासिक सामाजिक सुरक्षा भत्ता वितरण गरेको हो ।

बिहीबार पालिकाको वडा नम्बर-३ मिर्गे वडा कार्यालयमा भत्ता वितरण गरिएको वडा नम्बर-३ का वडा अध्यक्ष कमल अधिकारीले जानकारी दिए। बिहीबार वडा नम्बर-३ का दुई सय ६२ जना जेष्ठ नागरिक, दलित बालबालिका, एकल महिला तथा अपाङ्गता भएका व्यक्तिहरूलाई भत्ता वितरण गरिएको थियो ।

कुल ४ सय ६८ जना लाभग्राही रहेको मिर्गे धेरैजसो काठमाडौं रहेकाले गाउँमा रहेका दुई सय ६२ जनालाई मात्र भत्ता वितरण गरिएको थियो।सहरमा रहेका दुई सय ६ जना लाभग्राहीले भने बैंकबाट सिधै भत्ता बुझ्न सक्ने वडा सचिव अमृत तामाङले बताए।

वैतेश्वर गाउँपालिकामा सामाजिक सुरक्षा भत्ता प्राप्त गर्ने करिब ३१ सय ५० जना लाभग्राही रहेका छन्। पालिकाले शुक्रवार वडा नम्बर-२ र आइतबार वडा नम्बर-१ मा पनि घुम्ती शिविर कार्यक्रम मार्फत नै भत्ता वितरण गर्ने भएको छ ।आइतबारसम्म सबै वडाको भत्ता वितरण कार्य सम्पन्न गर्ने जनाएको छ।

सुबास बस्नेत