पोखरा- गोर्खा मिडिया नेट्वर्कका पूर्वउपाध्यक्ष एवम् पूर्वडीआईजी छविलाल जोशीसँग जिल्ला अदालत कास्कीमा मंगलबार बयान सकिएको छ ।
सहकारी ठगी, सम्पत्ति शुद्धीकरण र संगठित अपराधको मुद्दामा जोशीसँग न्यायाधीश नितिज राईको इजालसमा बयान सकिएको हो । अदालतमा जोशीको बयान सकिएपछि अब अन्यको पालो छ ।
सोमबारदेखि सुरु भएको छविको बयान मंगलबार सकिएपछि अर्का प्रतिवादी लीला पछाईसँग बयान सुरु भएको छ।
अदालत लगिए पनि राष्ट्रिय स्वतन्त्र पार्टी (रास्वपा) सभापति रवि लामिछानेसँग आज बयान लिइएन ।
पछाईको बयान सकिएपछि मात्रै लामिछानेको पालो आउने बताइएको छ ।
मंगलबार लामिछाने, पूर्व डीआईजी एवम् गोर्खा मिडिया नेटवर्ककका तत्कालीन सञ्चालक जोशी, लीला पछाई र रामबहादुर खनाललाई अदालतमा उपस्थित गराइएको थियो । कृष्णबहादुर गुरुङ अस्वस्थ भएकाले अस्पतालमै छन् ।
यसअघि आइतबार सरकारी वकिलको कार्यालय, कास्कीले लामिछाने, पूर्व डीआईजी छविलाल जोशीसहित ४४ जनालाई आइतबार सहकारी ठगीको आरोपमा प्रतिवादी बनाएर मुद्दा दर्ता गरेको थियो ।
सरकारी वकिल कार्यालयले सूर्यदर्शन सहकारीको रकम ठगी प्रकरणमा हालसम्म ६३ जनाविरुद्ध जिल्ला अदालत कास्कीमा मुद्दा दायर गरिएको जनाएको छ ।
प्रतिक्रिया