काठमाडौं– सत्ताको नेतृत्व गरिरहेको नेकपा एमाले पोखरामा जारी राष्ट्रिय स्वतन्त्र पार्टी (रास्वपा) को जारी आन्दोलनविरुद्ध कडा रूपमा प्रस्तुत भएको छ ।

एमालेका महासचिव शंकर पोखरेलले बिहीबार विज्ञप्ति जारी गरेर सरकारलाई सहकारी ठगी प्रकरणको निष्पक्ष न्यायिक निरूपणको वातावरण तयार गर्न आग्रह गरेका छन् ।

‘हाम्रो पार्टी अख्तियार प्राप्त निकायवाट भइरहेको अनुसन्धान र अभियोजनको प्रक्रियामा बाधा पुर्‍याउने खालका कुनै पनि प्रकारका गतिविधि नगर्न सम्बन्धित सबै पक्षको ध्यानाकर्षण गर्दछ,’ विज्ञप्तिमा भनिएको छ, ‘नेपाल सरकारलाई समेत त्यस प्रकारको गतिविधि नियन्त्रण गर्न स्वच्छ र निष्पक्ष न्यायिक निरूपणको वातावरण तयार गर्न अनुरोध गर्दछ ।’

एमालेले रास्वपाका नेताहरूले प्रधानमन्त्री केपी शर्मा ओली र मन्त्रीहरूलाई गालीगलौच गरेको र गलत आक्षेप लगाएको भन्दै आपत्ति जनाएको छ ।

‘संसदीय छानबिन समितिले सर्वसम्मत रूपमा औंल्याएको विषयमा छानबिनको प्रक्रिया अघि बढिरहेको अवस्थामा प्रधानमन्त्री र नेपाल सरकारका जिम्मेवार व्यक्ति र निकायविरुद्ध जिम्मेवार व्यक्तिबाटै अमर्यादित अभिव्यक्ति दिने, गालीगलौज र गलत आक्षेप लगाउँदै छानबिन प्रभावित गर्ने गरी भ्रम सिर्जना गर्ने र अस्वस्थ वातावरण बनाउनु अत्यन्त दुःखद विषय हो,’ पोखरेलले भनेका छन् ।

अनुसन्धान र अभियोजनमा दबाब दिने र प्रभाव पार्ने काम कहीँ कतैबाट हुनु नहुनेमा जोड दिँदै एमालेले न्यायिक निरूपणको काम अदालती प्रक्रियाबाट हुने बैधानिक स्थापित परम्परा स्मरण गराएको छ ।

‘यस्तो विषयमा सरकार र त्यसको नेतृत्वलाई जोडेर चर्चा गर्नु, अनुसन्धान र अभियोजन प्रक्रियालाई अनुचित प्रभाव पार्ने कार्य न्यायिक दृष्टिकोणवाट अनुपयुक्त हो,’ एमालेले भनेको छ ।