काठमाडौं- संसदीय सुनुवाइ समितिले निर्वाचन आयुक्तमा प्रस्तावित कृष्णमान प्रधानबारेमा थप छलफल गर्ने निर्णय गरेको छ ।

सिंहदरबारमा बुधबार प्रस्तावित आयुक्त प्रधानसंग छलफल गरेपछि समितिले यस बिषयमा थप छलफल गर्नुपर्ने निष्कर्ष निकालेको हो ।

अब समितिको अर्को बैठकले निर्वाचन आयुक्तमा प्रस्तावित प्रधानको नाम अनुमोदन गर्ने वा नगर्ने निर्णय लिने छ ।

त्यसअघि बैठकमा सांसदले उनीविरुद्धको उजुरीबारे प्रश्न राखेका थिए। प्रधानले त्यसको जवाफ दिएका थिए ।

समिति सदस्य महेश बर्तौलाले प्रधानविरुद्ध गम्भीर उजुरी परेको भन्दै त्यसको जवाफ दिन माग गरेका थिए । आजको सुनुवाइका क्रममा पत्रकाहरूलाई बाहिर निकालेर सांसदहरूले प्रधानसँग सवाल-जवाफ गरेका थिए ।

त्यस्तै समिति सदस्य जीवन परियारले चरित्रबारे नै प्रश्न उठिसकेपछि आफूलाई आरोपबाट मुक्त गर्ने आधारबारे प्रश्न गरेका थिए ।

त्यस्तै समिति सदस्य जनार्दन शर्माले उजुरी हेर्दा निकै गम्भीर देखिएकाले उच्च नैतिक चरित्रको बिषय आकर्षित हुनसक्ने उल्लेख गरे ।

समिति सदस्यहरूका प्रश्नको जवाफ दिँदै प्रधानले समितिबाट उजुरी प्राप्त नगरेको र पत्रपत्रिकाबाट जानकारी पाएको बताए ।

उनले यसअघि आफ्नो कार्यालयमा कार्यरत कर्मचारीले कानुनविपरीत काम गरेकाले अदालतमा उजुरी गर्दा विवाद निरुपण भएको बताए ।

अदालतमा मिलिसकेको बिषयमा समितिमा उजुरी गर्नु कतिको उचित हुन्छ भन्दै उनले प्रश्न गरे ।

उजुरी गर्दैमा उच्च नैतिक चरित्र हो की होइन भनेर मूल्याङ्कन गर्न नहुने उनले बताए ।

प्रधानविरुद्ध समितिमा यौन दुर्व्यवहार लगायत उजुरी परेका थिए । केही दिनअघि बसेको संवैधानिक परिषद्को बैठकले प्रधानलाई निर्वाचन आयोगको आयुक्तमा सिफारिस गरेको थियो ।