काठमाडौं– सहकारी ठगी प्रकरण छानबिनका लागि गठन गरिने संसदीय समितिको कार्यादेश निर्धारण गर्न गठित कार्यदलको बैठक सुरु भएको छ ।

कानुन मन्त्रालयमा ३ बजेका लागि बोलाइएको बैठक समिति संयोजक तथा कानुन मन्त्री पदम गिरी पर्वतबाट आउन ढिलो भएकाले ४ बजे पछि बसेको हो ।

कस्तो र कुन प्रकारको छानबिन समिति बनाउने भन्ने बारेमा टीओआर तयार गर्न समितिको निर्णायक बैठक हुने  गिरीको भनाइ छ ।

उनले शनिबार खबरहबलाई भने, ‘कुनै पनि व्यक्तिको नाम किटान नगरी समग्र सहकारीको छानबिन हुने विषयमा कुरा मिल्छ । हामी त्यसको अभ्यासमा लागिरहेका छौँ ।’

उनले अगाडि थपे, ‘आजको बैठक निर्णायक बैठक भनेर सत्ता पक्ष र प्रतिपक्षले लिएका छौँ  । हामी सहमति जुटाएर जान्छौँ ।’

सहकारी ठगी प्रकरणमा सत्तापक्ष उपप्रधान तथा गृहमन्त्री रवि लामिछाने मुछिएको भन्दै नेपाली कांग्रेसले निरन्तर सदन अवरोध गरिरहेको छ ।

यता कांग्रेस पनि व्यक्तिको नाम उल्लेख नगर्ने तर गृहमन्त्री लामिछाने संलग्न संस्थाहरू माथि छानबिन गरेर जान सकिने आधारहरू निर्माण गरेर जाने सहमति हुन सक्ने बताएको छ ।

यसबारे कांग्रेस सचेतक रमेश लेखकले खबरहबलाई भने, ‘व्यक्तिको नाम उल्लेख नगर्ने तर गृहमन्त्री लामिछाने संलग्न संस्थाहरू माथि छानबिन गरेर जान सकिने आधारहरू भए भने सहमति जुट्ला । तर सबै कुरा छोडेर सहमति हुने कुरामा कांग्रेस तयार छैन ।’

व्यक्तिका नाममा संसदीय छानबिन समिति बनाउँदा गलत नजिरको विकास हुने भएपछि कांग्रेसले नयाँ प्रस्ताव ल्याएको बताइएको छ ।

कांग्रेस पनि लचिलो भएकाले सहमति जुट्न सक्ने सत्ता पक्ष र प्रतिपक्षको आंकलन छ ।

टीओआर बनाउने कार्यदलमा कानूनमन्त्री गिरी, कांग्रेस सहमहामन्त्री जीवन परियार, संसद् ज्ञानेन्द्रबहादुर कार्की, एमाले प्रमुख सचेतक महेश बर्तौला र रास्वपाबाट शिशिर खनाल छन् ।