काठमाडौं- प्रमुख प्रतिपक्षी नेपाली कांग्रेसले कान्तिपुर मिडिया ग्रुपका अध्यक्ष कैलाश सिरोहियालाई पक्राउ गरिएको विषय बालुवाटार बैठकमा उठाएको छ ।

संसद्‍‍मा देखिएको गतिरोध अन्त्यका विकल्प खोज्न प्रधानमन्त्री पुष्पकमल दाहाल प्रचण्डले डाकेको शीर्ष नेताको बैठकमा कांग्रेसले सिरोहिया प्रकरणबारे प्रश्न गरेको हो ।

कांग्रेसका प्रमुख सचेतक रमेश लेखकले बैठकमा कान्तिपुर मिडिया ग्रुपका अध्यक्ष सिरोहियालाई गरिएको धरपकडबारे प्रधानमन्त्री प्रचण्डको ध्यानाकर्षण गराएको जानकारी दिएका छन् ।

‘कान्तिपुर मिडिया ग्रुपका अध्यक्ष सिरोहियाजीलाई जुन ढंगले धरपकड गरियो, आतंकित गर्ने काम भयो त्यो कुरामा हामी गम्भीर छौँ । गम्भीर ध्यानाकृष्ट भएको छ भनेर कुरा उठायौँ भनेर कुरा उठायौँ,’ प्रमुख सचेतक लेखकले बैठकपछि भने ।

यसअघि यही मंगलबार सिरोहियाविरुद्ध धनुषा जिल्ला अदालतले पक्राउ पुर्जी जारी गरेपछि कान्तिपुरको थापाथलीस्थित कार्यालयमै कांग्रेसका २२ जना सांसद पुगेका थिए ।

त्यही दिन साँझ सिरोहिया पक्राउ परेपछि कांग्रेसले मिडियामा हस्तक्षेप गरेर गठबन्धन सरकारले अधिनायकवाद ल्याउन खोजेको आरोप लगाउँदै आएको छ ।

यसैबीच सिरोहियालाई धनुषा अदालतले शुक्रबादेखि तीन दिनका लागि हिरासतमै राख्न अनुमति दिएको छ । मंगलबारदेखि पहिलो पटकको म्याद शुक्रबार नै सकिएपछि प्रहरीले सरकारी वकिलमार्फत थप म्याद लिएको हो ।