एजेन्सी- स्पेनिस फुटबल क्लब बार्सिलोनाले जाभी हर्नान्डेजलाई प्रमुख प्रशिक्षकबाट बर्खास्त गरेको छ ।

एफसी बार्सिलोनाका अध्यक्ष जोन लापोर्टाले शुक्रबार बिहान नयाँ सिजन २०२४/०२५ का लागि प्रमुख प्रशिक्षकको भूमिकामा निरन्तरता नदिइने सूचना दिएका थिए ।

अध्यक्ष जोन लापोर्टाले जाभी हर्नान्डेजलाई प्रमुख प्रशिक्षकबाट हटाउनुअघि उनीसँग संवाद गरेका थिए । जाभीले सन् २०२४-२५ को सिजनमा पनि निरन्तर रहन चाहेका थिए । तर क्लब व्यस्थापन आफ्ना पूर्वचर्चित मिडफिल्डर जाभीलाई प्रमुख प्रशिक्षकबाट बर्खास्त गरेको हो ।

यस सिजन जाभीको कमानमा बार्सिलोना खराब अवस्थाबाट गुज्रियो । उसले ला लिगाको उपाधि रक्षा गर्न सकेन। उपाधि भिडन्तमा रियल मड्रिडसँग बार्सिलोना १२ अंकले पछि पर्दै दोस्रोमा खुम्चियो ।

उता युरोपेली च्याम्पियन्स लिगमा पनि बार्साको प्रदर्शन बिर्सनलायक रह्यो । यस्तोमा केबल दुई सिजनमै जाभीलाई बार्सिलोनाले क्लबबाट बिदा गरेको हो ।

उनलाई बार्सिलोनाले मुख्य प्रशिक्षकका रुपमा दुई वर्षअघि भित्र्याएको थियो । ४३ वर्षीय जाभी बार्सिलोनासँगको सम्झौता पनि सन् २०२४ सम्म मात्रै थियो । आफ्नो समयका जादुयी मिडफिल्डर जाभीले बार्सिलोनाका लागि १७ वर्ष खेलेका थिए ।