महोत्तरी– राष्ट्रिय हात्तिपाईले रोग निवारण कार्यक्रम २०८१ को पुर्वसन्ध्यामा महोत्तरीको बर्दिबासले आम औषधि सेवनको अभिमुखीकरण गराएको छ ।

नगर क्षेत्रमा कार्यरत स्वास्थ्यकर्मी, स्वास्थ्य व्यवसायी, पत्रकार, जनप्रतिनिधिहरूको सहभागितामा बुधबार भएको उक्त कार्यक्रममा वैशाख १६ गते देखि सुरु हुने औषधि सेवन प्रक्रियाको विषयमा अभिमुखीकरण दिएको हो ।

प्राणघातक नभएता पनि मानिसहरूलाई अशक्त तथा अपाङ्ग बनाउने यो रोगका विरुद्ध हरेक वर्ष आईभरमेक्टिन, इथाईल्कारबमाजली र अल्वेन्डाजोल भन्ने औषधि अनिवार्य  खुवाउनु पर्ने स्वास्थ्यकर्मीहरूले बताएका छन् । तीन वटै औषधि उचाइअनुसार निर्धारण हुने र उचाइ नापेर मात्र सेवन गराउने प्रक्रिया रहेको स्वास्थ्यकर्मीहरूको भनाई छ ।

रोग संक्रमणको हिसाबले महोत्तरी जोखिममा नै रहेको बताउँदै नगर स्वास्थ्य शाखा प्रमुख सुरेश पासवानले उक्त औषधि निर्धारित मिति देखि हरेक टोल, विद्यालयहरूमा पाइने जानकारी दिए ।

माईक्रोफालेरिया परजीवी घटाएर रोग लाग्न नदिने यो औषधि दुई वर्ष भन्दा मुनिका बालबालिका, गर्भवती, सुत्केरी आमा, सिकिस्त बिरामी र क्षारे रोग भएकाहरूका लागि खुवाउन नमिल्ने स्वास्थ्यकर्मीहरूले सल्लाह दिएका छन् ।

वैशाख २६ गतेसम्म निर्धारण गरिएता पनी आम मानिसहरूको सेवनको दरलाई हेरेर उक्त मितिलाई बढाउन सकिने नगर स्वास्थ्य शाखाले जनाएको छ । समुदायमा अभिमुखीकरणको लागि नगरले विभिन्न ठाउँमा स्वयंसेवक समेत परिचालन गरेको छ ।

नगरको ७६ हजार १ सय ४१ जनसंख्या मध्ये ७३ हजारलाई औषधि खुवाउने नगरले लक्ष्य राखेको छ । जिल्लाको अन्य पालिकाको तुलनामा बर्दिबास नगरपालिकामा लक्षित कुल जनसंख्याको ९६ प्रतिशतलाई खुवाइएको थियो । यो जिल्लाको नै सबैभन्दा बढी प्रतिशत हो ।