काठमाडौं- अघिल्लो वर्ष अक्टोबर ७ मा विद्रोही समूह हमासले इजरायलमा आक्रमण गरेपछि अपहरण गरि लगिएका नेपाली युवा विपिन जोशीको रिहाइका लागि प्रधानमन्त्री पुष्पकमल दाहाल प्रचण्डले पनि कतारसँग गुहार लगाएका छन् ।

कतारका अमिर (राजा) शेख तामिम बिल हमाद अल थानीसँग बुधबार काठमाडौंमा भएको ‘द्विपक्षीय वार्ता’ का क्रममा प्रधानमन्त्रीले यस्तो विपिनको रिहाइका लागि गम्भीर पहल गरिदिन आग्रह गरेका हुन् ।

यसअघि मंगलबार शीतल निवासमा भएको भेटमा राष्ट्रपति रामचन्द्र पौडेलले पनि विपिनको रिहाइका लागि कतारको प्रभाकारी भूमिकाको अपेक्षा गरेका थिए ।

कतारले हमास र इजरालयबीच जारी युद्धलाई शान्तिपूर्ण निकास दिन पहल गरिरहेको छ । उसकै पहलमा यसअघि पनि छोटो समयको युद्धबिराम भएर बन्दी आदान प्रदान सम्भव भएको थियो । तर त्यसबेला हमासको कब्जामा रहेका भनिएका नेपाली युवा विपिन रिहा हुन सकेका थिएनन् ।

राष्ट्रपतिपछि प्रधानमन्त्री प्रचण्डले पनि कृषि पढ्न गएका नेपाली विद्यार्थी विपिनको सकुशल रिहाइका लागि पहल गरिदिन कतारी अमिरलाई भनेका हुन् ।

‘शैक्षिक इन्टर्नशिपको लागि इजरायलमा रहेका निर्दोष नेपाली विद्यार्थी विपिन जोशी अक्टोबर ७ मा हमासको आक्रमणपछि बेपत्ता छन्’, दाहालले भने, ‘उनको अवस्था हालसम्म थाहा हुन सकेको छैन । म उनको शीघ्र तथा सुरक्षित रिहाइको सहजीकरणका लागि कतार सरकार समक्ष अनुरोध गर्न चाहन्छु ।’

उनले यसबारेमा व्यक्तिगत तहमै कतारका राजाको ध्यानाकर्षण गराएको उनको सचिवालयले जनाएको छ ।

त्यसैगरी पश्चिम एसियामा बिग्रिँदै गएको परिस्थितिप्रति चिन्ता जनाउँदै उनले जतिसक्दो चाँडो युद्ध अन्त्य भएर शान्ति पुनःस्थापनाको कामना पनि गरेका छन् ।