काठमाडौं- बिहीबार हुने राष्ट्रियसभा सदस्य निर्वाचनको तयारी पूरा भएको छ ।

यसै क्रममा कोशी प्रदेशमा मतदानस्थल लगायत सम्पूर्ण प्रक्रिया र तयारी पूरा भएको निर्वाचन अधिकृतको कार्यालय, विराटनगरले जनाएको छ । निर्वाचनका लागि प्रदेश निर्वाचन कार्यालय मतदानस्थलमा दुई वटा मतदान केन्द्र निर्धारण गरिएको निर्वाचन अधिकृतको कार्यालयका प्रवक्ता हेमबहादुर बुढाथोकीले जानकारी दिए ।

उनले प्रदेश र स्थानीय तहका जनप्रतिनिधिका लागि अलग–अलग मतदान केन्द्र निर्धारण गरिएको बताए । त्यसैगरी, मतदान सकिएपछि मतगणना गरिने उनले बताए । कोशी प्रदेशमा एक महिला र एक अन्य गरि २ पदका लागि निर्वाचन हुँदैछ ।

राष्ट्रियसभा सदस्य निर्वाचनमा प्रदेशसभाका ९३ र स्थानीय तहका प्रमुख/उपप्रमुख २७४ गरी ३६७ जना मतदाता रहेका छन् । राष्ट्रियसभा सदस्य निर्वाचनमा प्रदेशसभा सदस्यको मतभार ५३ र स्थानीय तहका प्रमुख/उपप्रमुखको मतदभार १९ रहेको छ ।