काठमाडौं– नेकपा माओवादी केन्द्रका सांसद अमनलाल मोदीले सार्वजनिक लेखा समितिका सभापति ऋषिकेश पोखरेलको राजीनामा माग गरेका छन् ।

सिंहदरबारमा सोमबार बसेको प्रतिनिधिसभा अन्तर्गतको सार्वजनिक लेखा समिति बैठकमा माओवादी सांसद मोदीले समिति सरकारको छाया जस्तो देखिएको भन्दै सभापति पोखरेलको राजीनामा माग गरेका हुन् ।

सरकारलाई चेक एन्ड ब्यालेन्स गर्ने समितिका सभापतिविरुद्ध नै आर्थिक लेनदेनको कुरा उठेकाले मार्गप्रसस्त गर्नुपर्ने उनले बताए ।

उनले सहकारीका बारेमा सभापति पोखरेल र परिवारमाथि पनि प्रश्न उठेकाले केही न केही जवाफ दिनुपर्ने जिकिर गरे ।  सांसद मोदीले लेखा समितिको सभापति प्रतिपक्षीले पाउनुपर्ने बताए । त्यस्तै एमाले सांसद योगेश भट्टराईले लेखा समितिका सभापतिकै बारेमा आर्थिक लेनदेनमा कुरा उठेको अवस्थामा प्रस्ट पार्नुपर्ने बताए ।

आर्थिक लेनदेनमा आफू ठिक ठाउँमा उभिए मात्रै अरूमाथि नियमन गर्न सहज हुने उनको भनाइ थियो । उनले सभापति र उनका परिवारका विषयमा कुरा उठिसकेपछि न्यायिक निरूपणमा जान सुझाव दिए ।

उनले समिति सभापति परिवर्तन गर्ने विषयमा राजनीतिक समझदारी आवश्यक रहेको उल्लेख गरे । समिति सभापति ऋषिकेश पोखरेलले नीतिगत रूपमा आफूमाथि उठेका विषयमा विभिन्न ठाउँमा जवाफ दिएको बताए ।

कानुनी प्रक्रियामा रहेका विषयको सबै परीक्षामा समावेश हुन आफू तयार रहेकाले समितिमा यस विषयमा केही नबोल्ने बताए । उनले सभापति चयनका विषयमा दलहरुबीचको सहमति स्वीकार्य हुने धारणा राखे ।

करिब चार महिनापछि बसेको बैठकमा बेरुजु छलफलको प्रगति समीक्षासम्बन्धी विषयमा सामान्य छलफल भएको थियो । सभापति पोखरेलले अव समितिलाई क्रियाशील बनाउने बताए ।

ऋषिकेश पत्नीसहित २६ जना विरुद्ध सहकारी ठगीमा मुद्दा दर्ता भएको छ । मोरङ जिल्लाको उमा गौरी कृषि सहकारी संस्थामा भएको ठगी प्रकरणमा सभापति ऋषिकेशकी पत्नी अञ्जला कोइरालासहित २६ जनाविरुद्ध मोरङ जिल्ला अदालतमा मंसिर २८ गते मुद्दा दर्ता भएको हो ।

सरकारी वकिलको कार्यालय मोरङले सभापति पोखरेलकी पत्नी कोइरालासहित २६ जना विरुद्ध सहकारी ऐन, २०७४ को दफा १२२ अनुसार प्रतिवादी बनाएर मुद्दा दर्ता गरेको छ ।

उनकी पत्नी अञ्जला  अहिलेसम्म फरार छिन् । तर, पोख्रेलले यसको जवाफ दिएका छैनन् ।