काठमाडौं– सत्तारुढ दलहरूले सरकारका हालसम्मका कामहरूबारे साझा दृष्टिकोण बनाएर आगामी बाटो तय गर्न संयुक्त बैठक गर्ने भएका छन् ।

प्रधानमन्त्रीको सरकारी निवास बालुवाटारमा बुधबार बसेको सत्तारुढ दलहरूको बैठकले सरकारका हालसम्मका उपलब्धि र आगामी दिनका कामहरूबारे छलफल गर्न बैठक बोलाउने निर्णय गरेको हो ।

बालुवाटार बैठकपछि एमाले महासचिव शंकर पोखरेलले शुक्रबार दिउँसो ३ बजेका लागि सत्ता साझेदार दलहरूको बैठक बोलाउने निर्णय गरिएको जानकारी दिए ।

‘सरकारमा रहेका दलहरूका तर्फबाट अहिलेसम्मका काम र आगामी दिनमा सरकारमा रहेका दलहरूका तर्फबाट सामूहिक रूपमा कसरी अगाडि बढ्ने भन्नेबारे पर्सि ३ बजे बैठक बसेर दृष्टिकोण बाहिर ल्याउने सहमति गरेका छौँ,’ पोखरेलले भने ।

उनले बुधबार दिउँसो ३ बजे प्रधानमन्त्री केपी शर्मा ओलीले सरकार गठनको सय दिन पुगेको अवसरमा देशबासीका नाममा सम्बोधन गर्ने पनि जानकारी दिए ।

‘सरकार गठनको सय दिन पुगेको उपलक्ष्यमा प्रधानमन्त्रीज्यूले ३ बजे सम्बोधन गर्ने कार्यक्रम रहेको छ,’ महासचिव पोखरेलले भने, ‘उहाँले सरकारका तर्फबाट भए गरेका कामहरू र आगामी दिनमा गर्ने कामहरूको सन्दर्भका बारेमा सम्बोधन गर्नुहुनेछ ।’

सरकारलाई समर्थन गरिरहेका राजनीतिक दलहरूको बैठकमा सरकारको सय दिनको प्रगति, समसामयिक घटनाक्रम र राष्ट्रिय हित एवम् मुद्दामा समान धारणासहित एक ढिक्का भएर अघि बढ्ने विषयमा छलफल भएको बताइएको छ ।

बैठकमा लोकतान्त्रिक पद्धति, विधिको शासन, सुशासन र जनतामा सेवा प्रवाहबारे सरकार स्पष्ट भई दृढताका साथ काम गरिरहेको अवगत गराइएको छ ।