काठमाडौं – बलिउड नायक सलमान खानलाई लरेन्स विस्नोई ग्याङबाट लगातार ज्यान मार्ने धम्की आइरहेको छ । केही महिनाअघि उनको घरमा गोली प्रहार भएको थियो ।

सोही ग्याङले गत असोज २७ गते सलमान निकट मानिने नेता बाबा सिद्दिकी गोली हानी हत्या गरेको थियो । त्यसको ६ दिनपछि सलमानलाई पुन: ज्यान मार्न धम्की आएको थियो ।

गत असोज २ गते मुम्बईको ट्राफिक कन्ट्रोल रुममा व्हाट्सएप म्यासेजमार्फत सो धम्की आएको हो । मुम्बई पुलिसका अनुसार सो धम्कीको सन्देशमा लेखिएको थियो, ‘सलमान खान जीवित रहन र लरेन्ससँगको दुश्मनी अन्त्य गर्न चाहन्छन् भने उनले ५ करोड रुपैयाँ तिर्नुपर्नेछ। पैसा नदिए सलमान खानको हालत बाबा सिद्दिकीको भन्दा खराब हुनेछ।’

सो धम्कीपछि सलमानको सुरक्षा कडा बनाइएको छ । सोहीकारण पनि उनी तत्कालै काममा नफर्कने अनुमान गरिएको थियो ।

यद्यपि सलमान पूर्व योजनाअनुसार काममा फर्किएको पाइएको छ । उनी धम्कीका कारण आफ्ना कुनै पनि पूर्वनिर्धारित काम रोक्ने सोचमा नभएको भारतीय मिडियाहरुले उल्लेख गरेका छन् ।

इन्डिया टुडेले निर्माण टिम निकट स्रोतको दाबी गर्दै सलमान फिल्म ‘सिकन्दर’को छायाङ्नमा सहभागी भएको बताएको छ । उनी मंगलबारबाट छायाङ्नमा जोडिएको उल्लेख गरिएको छ ।

छायाङ्नस्थलमा सलमान कडा सुरक्षा घेरामा छन् । आगामी साता अर्थात् दिवालीसम्म उनी छायाङ्नमा रहने बुझिएको छ ।

त्यस्तै, रोहित सेट्टीको फिल्म ‘सिङ्गम ३’ मा सलमानको केमियो रोल नहटाइने भएको छ । भारतीय मिडियाका अनुसार यस फिल्ममा सलमानले ‘दबङ’ को पात्र ‘चुलबुल पाण्डे‘को चरित्रमा केमियो दिने तय भएअनुसार छायाङ्नमा सहभागी भएका छन् ।

धम्कीका कारण सलमान छायाङ्नमा सहभागी हुन नसक्ने भन्दै उनको केमियो बिना नै फिल्म प्रदर्शनमा आउने चर्चा चुलिएको थियो । तर, काममा फर्किएसँगै उनी मंगलबार मुम्बईमै ‘सिङ्गम ३’ को छायाङ्नस्थल  पुगेका हुन् ।