काठमाडौं- परियोजना सुरु गरेको १० वर्षमा पनि निर्माण अघि नबढ्दा चक्रपथ विस्तारअन्तर्गत दोस्रो खण्ड कलंकी–चाबहिल सडक अस्तव्यस्त बनेको छ ।

कोटेश्वर-कलंकी विस्तारको दशक हुन लाग्दा पनि दोस्रो खण्डको कामले अझै गति लिन सकेको छैन । त्यहीकारण यो सडकखण्डमा हिउँदमा धुलो र वर्षामा हिलोले अस्तव्यस्त हुने गरेको छ ।

निर्माणमा ढिलाइका कारण गोंगबु-सामाखुसी सडकखण्डमा सर्वसाधारणले भोग्नु परेको सास्ती वर्णग गरी साध्य छैन।

कलंकीदेखि चाबहिलसम्मको चक्रपथ विस्तारका लागि निर्माणस्थलका संरचना हटाउने र सर्भिस ट्रयाक खोल्ने काम केही सकिएको छ ।

तर अझै पनि धेरै क्षेत्रमा सर्भिस ट्रयाक पनि राम्ररी खोलिएको छैन । चक्रपथ विस्तार आयोजनाले चीनसँग सम्झौता भइसकेकाले अब कामले गति लिने दाबी गरिरहेको छ ।