भोजपुरमा जारी सातौँ अन्तराष्ट्रिय आमन्त्रित मेयर भोजपुर गोल्डकप प्रतियोगिताको क्वार्टर फाइनलअन्तर्गत तेस्रो खेलमा मोरङको डाँगीहाट युथ क्लबलाई हराउँदै सलहेश युवा क्लब सिरहा सेमिफाइनलमा पुगेको छ ।

डाँगीहाटलाई शून्यका विरुद्ध ४ गोल गर्दै सिरहा सेमिफाइनल पुगेको हो । हारसँगै डाँगीहाट घर फर्किएको छ ।

सहलेसका लागि खेलको २६ औँ र ७५ औँ मिनेटमा स्टेफन विनोङले गोल गरे ।

यस्तै सप्तरीकै विदेशी खेलाडी फोर्ड फोफोनाले खेलको ५१ औँ मिनेटमा र आदित्य शाक्यले ८६ औँ मिनेटमा गोल गरे । डाँगीहाटले कयौँ पटक पोस्टचार्ज गरे पनि गोलमा असफल रह्यो ।

खेलमा म्यानअफ द म्याच सिरहाका स्टेफन विनोङ भए । उनलाई नगद ५ हजार प्रदान गरिएको आयोजकले जनाएको छ ।

बुधबार क्वाटरफाईनलको अन्तिम खेल चर्च ब्वाइज युनाइटेड र आयोजक जिल्ला फुटबल संघ भोजपुरबीच हुनेछ । प्रतियोगिताका विजेता र उपविजेताले उपाधिसहित क्रमशः नगद ५ लाख र ३ लाख पाउने छन् ।

भोजपुर रंगशालामा जारी प्रतियोगितामा ‘ए’ डिभिजनका दुई क्लबसहित आठ टिमले सहभागिता जनाएका छन् ।