कतारका अमिर शेख तमिम बिन हमाद अल थानी सवार जहाज मंगलबार अपरान्ह काठमाडौंमा अवतरण हुने भएपछि सडक खाली गरिएको छ ।

भ्रमणलाई व्यवस्थित र सफल बनाउन सुरक्षा व्यवस्थालाई चुस्त पार्ने भन्दै प्रहरीले त्रिभुवन विमानस्थलदेखि शीतल निवास र सोल्टीमोडसम्मको सडक खाली गरेको हो ।

रष्ट्रपति रामचन्द्र पौडेलको मैत्रीपूर्ण निमन्त्रणामा उनी नेपालको दुई दिने राजकीय भ्रमणका लागि नेपाल आउँदैछन् ।

अमिर शेखको भ्रमणभर त्रिभुवन अन्तर्राष्ट्रिय विमानस्थलदेखि बानेश्वर- शीतल निवास र शीतल निवासदेखि सोल्टीमोडसम्मको सडक खाली गरिँदैछ ।

अहिले त्रिभुवन विमानस्थलबाट शीतल निवाससम्म पुग्ने मुख्य सडकमा निजी सवारी चल्न रोक लगाइएको छ ।

कतारी शेखलाई विमानस्थलमा स्वागत गरेर राष्ट्रपति पौडेलले सिधै शीतल निवास लानेछन् । त्यहाँ दुईजनाबीच औपचारिक भेटवार्ता हुनेछ ।

शीतल निवासमा भेट सकेपछि कतारी शेख त्यहाँबाट सिधै सोल्टीमोडस्थित होटल सोल्टीमा पुग्नेछन् । त्यहीकारण यी दुईजना भीआईपीको कारगेटबाहेक अन्य सबै सवारीलाई यी रुटमा निषेध गरिएको हो ।

सरकारले विशिष्ट व्यक्तिको सुरक्षा व्यवस्थापन कार्यविधि–२०७७ अनुसार कतारका राजालाई ‘अति विशिष्टस्तरको सुरक्षा’ दिने निर्णय गरेको  छ । त्यही निर्णयअनुसार ट्राफिक महाशाखाले उपत्यकाका मुख्य दुई रुटका सडक पूरै खाली गरेको हो । मुख्य रुट नै अवरुद्ध भएपछि मंगलबार रातिसम्मै ट्राफिक व्यवस्थापनमा समस्या हुन सक्ने महाशाखाले जनाएको छ ।

भ्रमणका सन्दर्भमा सुरक्षाका लागि नेपाली सेनाका बलाधिकृतरथीको संयोजकत्वमा नेपाल प्रहरी, सशस्त्र प्रहरी बल नेपाल र राष्ट्रिय अनुसन्धान विभागका विभिन्न टोली परिचालन भएको छ । उक्त संरचना मातहत विभिन्न सुरक्षासम्बन्धी व्यवस्था गरिएको छ ।

विशिष्ट पाहुनाका स्वागतदेखि बिदाइसम्मका विभिन्न कार्यक्रम र समारोहस्थलमा आवश्यकताका आधारमा सुरक्षा संयन्त्र परिचालन गरिएको नेपाली सेनाले जनाएको छ । कतारी अमिरको भ्रमणका सिलसिलामा विभिन्न तयारी बैठक समेत गरी कार्य जिम्मेवारी बाडँफाँड गरिएको छ ।

सरकारले जारी गरेको विशिष्ट व्यक्ति शान्ति सुरक्षा व्यवस्थापन कार्यविधि, २०७७ अनुसार सुरक्षा प्रबन्ध मिलाइएको छ । विशिष्ट पाहुनाको सुरक्षाका लागि सुरक्षा व्यवस्थापन चुस्त तुल्याइएको नेपाली सेनाका प्रवक्ता सहायक रथी गौरवकुमार केसीले बताए ।

कतारी अमिरको सुरक्षा व्यवस्थालाई मध्यनजर गरी उनको आगमन र प्रस्थानका समयमा त्रिभुवन अन्तर्राष्ट्रिय विमानस्थलबाट हुने अन्य सबै उडान १५-१५ मिनेट स्थगित गरिने विमानस्थलका महाप्रबन्धक जगन्नाथ निरौलाले जानकारी दिए।