जिल्ला प्रहरी कार्यालय सुनसरीका प्रहरी नायव उपरीक्षक (डीएसपी) नवीनकृष्ण भण्डारी गत चैत महिनाको सर्वोत्कृष्ट प्रहरी घोषित भएका छन् ।

विभागीय मूल्य-मान्यता, आदेश-निर्देशनको पालना गरी उच्च मनोबल र साहसका साथ कर्तव्य निर्वाह गरेको भन्दै उनलाई उत्कृष्ट प्रहरी घोषित गरिएको हो।

डीएसपी भण्डारीले सुनसरीको हरिनगर गाउँपालिका-२ का आशिफ अन्सारीको पैसा भएको झोला अपरिचित व्यक्तिहरूले लिएर भागेको घटनाको अनुसन्धानको क्रममा मोहम्मद इब्रान मन्सुरी मियाँ र उमेश मुखियालाई पक्राउ गरेका थिए ।

त्यस्तै उनले हरिनगर गाउँपालिका-३ स्थितमा हिन्दु र मुस्लिम समुदायबीच उत्पन्न विवादलाई प्रहरीको प्रभावकारी परिचालन गरि जनधनको क्षति हुनबाट जोगाउन महत्वपूर्ण भूमिका निर्वाह गरेका प्रदेश प्रहरी कार्यालयले जनाएको छ ।

सुनसरीको चतरामा आयोजना गरिएको १२ वर्षे ‘तेश्रो पिण्डेश्वर पूर्ण महाकुम्भ मेला’ को सुरक्षार्थ प्रभावकारी सुरक्षा योजना बनाई प्रहरी परिचालन गरेकाले डीएसपी भण्डारीलाई चैत महिनाको सर्वोकृष्ट प्रहरी घोषित गरि पुरस्कृत गरिएको कोशी प्रदेश प्रहरी प्रमुख डीआईजी चन्द्रकुवेर खापुङले बताए ।

पुरस्कृत भएका डीएसपी भण्डारीको तस्बिर कोशी प्रदेशका सबै प्रहरी कार्यालयमा महिन दिनसम्म राखिने उनले बताएका छन् ।