काठमाडौं- राष्ट्रिय प्रजातन्त्र पार्टी नेपालका अध्यक्ष कमल थापाले अहिले मुलुकमा कायम भ्रष्ट व्यवस्था अन्त्य गर्न आन्दोलनको विकल्प नभएको बताएका छन् । आज काठमाडौंमा आयोजित पार्टी संगठन सुदृढीकरण अभियान कार्यक्रमा बोल्दै अध्यक्ष थापाले परिवर्तन पक्षधरहरु एकै ठाउँमा उभिएर आन्दोलनमा होमिनुपर्ने बताए ।

एक्लै आन्दोलनमा जाँदा प्रभावकारी नहुने विगतको अभ्यासले पनि पुष्टि भएको भन्दै उनले निर्णायक आन्दोलनका लागि मोर्चाबन्दी जरुरी भएको विचार व्यक्त गरे ।

उनले भने, ‘एक्लाएक्लै आन्दोलन गर्ने भनाइले अप्रत्यक्ष रुपमा राजसंस्था, हिन्दुराष्ट्रको एजेन्डालाई कमजोर बनाउँछ ।’

अहिले आन्दोलनको लागि समय अनुक‍ूल भएको भन्दै थापाले मनपरितन्त्र र ब्रम्हलुटले सीमा नाघेकाले जनता अहिलेको व्यवस्था र प्रणालीबाट वाक्क दिक्क भएको समेत बताए ।