काठमाडौं – कथाकार गुरुप्रसाद मैनालीको चर्चित कथा ‘परालको आगो’मा आधारित रहेर निर्माण हुने फिल्ममा नायिका सुहाना थापा अनुबन्ध भएकी छन् ।

फिल्म निर्माण कम्पनी हरिओम सिने मेकर्सका तर्फबाट निर्माता सुशील पोखरेलले र सुहनाबीच शुक्रबार सम्झौता भएको हो । फिल्मको शीर्षक भने ‘परालको आगो’ नै रहेको बताइएको छ ।

मैनालीको चर्चित कृतिमा आधारित फिल्ममा काम गर्न पाउँदा आफू उत्साहित रहेको सुहानाले बताइन् । भनिन्, ‘एउटा अमर कृतिमा काम गर्न पाउनु मेरो लागि सौभाग्य हो ।’

यस फिल्मको निर्देशन लक्ष्मण सुनारले गर्ने बताइएको छ । निर्माता पोखरेलका अनुसार मैनाली कथा पुरस्कार ट्रस्टले केही समयअघि फिल्म निर्माणको अनुमति दिएको हो ।

यही शीर्षकमा ४५ वर्षअघि निर्देशक प्रताप सुब्बाले फिल्म निर्माण गरेका थिए । यस पटक फरक स्थान, प्रस्तुतीकरण र पटकथाका साथ नयाँ स्वरुपको फिल्म निर्माण हुने निर्माता पोखरेलको दाबी छ ।

आगामी फागुनबाट छायाङ्कन सुरु हुने यस फिल्मको प्रदर्शन २०८२ को दशैंमा गर्ने योजनामा निर्माण पक्ष छ ।