काठमाडौं– सत्ता साझेदार नेपाली कांग्रेसले देशको आर्थिक अवस्था र सुधारका उपायबारे विज्ञ समूहसँग छलफल गरेको छ । कांग्रेस संसदीय दलले शुक्रबार नयाँबानेश्वर स्थित संघीय संसद् भवनमा ‘नेपालको विद्यमान आर्थिक अवस्था र सुधारका उपायहरूबारे’ विज्ञहरूसँग छलफल गरेको हो ।

छलफलमा पूर्वअर्थमन्त्रीहरू, पूर्व अर्थराज्यमन्त्रीहरू, राष्ट्रिय योजना आयोगका पूर्व उपाध्यक्षहरू, नेपाल राष्ट्र बैंकका पूर्व गभर्नरसँगै निजी क्षेत्रतर्फ उद्योग वाणिज्य महासंघ, नेपाल चेम्बर अफ कमर्स, नेपाल उद्योग परिसंघ, निर्माण व्यवसायी महासंघ र अर्थ विज्ञहरू सहभागी थिए ।

पार्टी सभापति तथा संसदीय दलका नेता शेरबहादुर देउवाको प्रमुख आतिथ्यतामा सम्पन्न ‘नेपालको विद्यमान आर्थिक अवस्था र सुधारका उपायहरूबारे’को छलफलमा राष्ट्रिय सभा संसदीय दलका नेता कृष्णप्रसाद सिटौला, उपसभापति धनराज गुरुङ, महामन्त्री गगनकुमार थापा उपस्थिति थिए ।

छलफलमा गृहमन्त्री रमेश लेखक, परराष्ट्रमन्त्री डा. आरजु राणा, ऊर्जा, जलस्रोत तथा सिंचाईमन्त्री दीपक खड्का, प्रतिनिधि सभा र राष्ट्रिय सभाका प्रमुख सचेतकहरू तथा सचेतक, कांग्रेस केन्द्रीय सदस्य एवं उद्योगी विनोद चौधरीलगायतको पनि उपस्थिति रहेको दलको कार्यालयले जनाएको छ ।

छलफलमा प्राप्त सुझावहरूलाई संसदीय दलको आगामी बैठकबाट पारित गरेर कार्यान्वयनका लागि सरकारलाई सुझावसहित अनुरोध गरिने प्रमुख सचेतक श्यामकुमार घिमिरे जानकारी दिए ।