काठमाडौं- दक्षिण भारतीय फिल्म ‘ज्याक’को टोली छायांकनका लागि करिब एक सातादेखि काठमाडौंमा छ । निर्देशक बमरिल्लु भास्करले उपत्यकाको विभिन्न स्थानमा फिल्मको छायांकन गरिरहेका छन् ।

यस फिल्मको छायांकनमा आइतबारदेखि तेलगु स्टार प्रकाश राज सहभागी भएका छन् । उनले सामाजिक सञ्जाल एक्स (पहिलाको ट्विटर)मा भक्तपुरमा भइरहेको छायांकनको भिडियोसमेत राखेका छन् ।

प्रोडक्सन मेनेजर पुस्कार लामाका अनुसार प्रकाश राजको छायांकन तालिका १० दिनको रहेको छ । उनी भन्छन्, ‘गत सोमबारदेखि छायांकन भइरहेको छ । प्रकाश राज आजबाट जोडिनु भएको हो ।’

प्रकाश राज छायांकनका लागि शनिबार काठमाडौं आइपुगेका हुन् ।

यस फिल्ममा नेपाली प्राविधिकको पनि उल्लेखनीय सहभागिता रहेको बुझिएको छ । गोपनीयताका लागि लामाले संख्या भने खबरहबलाई खुलाएनन् । भन्छन्, ‘यो कुरा खुलाउन मलाई अधिकार दिइएको छैन ।’

यस फिल्मको शीर्ष भूमिकामा नायक सिद्धु जोन्नालगड्डा, वैष्णवी चैतन्य, प्रकाशराज लागयतको अभिनय रहेको छ ।

प्रकाश राज भारतको कर्नाटकका हुन् । उनी ९० को दशकदेखि फिल्ममा सक्रिय छन् । हालसम्म करिब ४०० भन्दा बढी फिल्ममा उनले अभिनय गरेका छन् । उनले कही फिल्म निर्माण र निर्देशन पनि गरेका छन् ।