काठमाडौं– टाउको दुख्ने, रुघाखोकी र ज्वरो आएर घरमै आराम गरिरहेका एमाले अध्यक्ष केपी शर्मा ओली हिरक महोत्सवमा उपस्थित भएका छन् ।
प्रतिनिधि परिषद् बैठकको दोस्रो दिन अस्वस्थताको कारण उपस्थित हुन नसकेका पार्टी अध्यक्ष केपी शर्मा ओली भने आज हिरक महोत्सवमा सहभागी भएका छन् ।
नेकपा एमालेले आज नेकपा स्थापना दिवसको अवसरमा हिरक महोत्सव मनाउँदै छ सो कार्यक्रममा नेकपा एकीकृत समाजवादीका सम्मानित नेता झलनाथ खनाल, पूर्व प्रधानमन्त्री बाबुराम भट्टराई पनि पुगिसकेका छन् ।
यस्तै पूर्व प्रधानमन्त्री तथा प्रमुख प्रतिपक्ष दलका नेता नेपाली कांग्रेसका सभापति शेरबहादुर देउवा पनि पुगिसकेको एमाले उपाध्यक्ष ईश्वर पोख्रेलको भनाइ छ । उनलाई प्रमुख वक्ताको रूपमा बोलाइएको हो ।
यस्तै मन्त्रीपरिषद् बैठक सकेर प्रधानमन्त्री पुष्पकमल दाहाल पनि हिरक महोत्सवमा जाने छन् ।
नेकपा स्थापनाको ७५ वर्ष पूरा भएको अवसरमा ललितपुरस्थित गोदावरीको सनराज हलमा हिरक महोत्सवको विशेष समारोह आयोजना गरिएको छ ।
तत्कालीन मन्त्रिपरिषद्का अध्यक्ष खिलराज रेग्मी, जसपा अध्यक्ष तथा उपप्रधानमन्त्री उपेन्द्र यादव, पूर्व प्रधानमन्त्री र अन्य पार्टी प्रमुख पनि कार्यक्रममा सहभागी छन् ।
कार्यक्रममा नेकपा एकीकृत समाजवादीका अध्यक्ष माधव नेपाललाई पनि आमन्त्रण गरिएको थियो । उनी अहिलेसम्म पुगेका छैनन् ।
आज महोत्सवमा पूर्व राष्ट्रपति विद्यादेवी भण्डारीलाई ‘राष्ट्रिय गौरव’ पदकबाट सम्मानित गरिने छ ।
प्रतिक्रिया