काठमाडौं– सडक व्यवसायीहरूले काठमाडौं महानगरको कार्यालयमा धर्ना दिएका छन् ।

पछिल्लो समय व्यवसायीहरूमाथि महानगरले अत्याचार गरेको भन्दै विभिन्न संघसंगठनको अगुवाइमा उनीहरूले काठमाडौं महानगर कार्यालयबाहिर धर्ना दिएका हुन् ।

उनीहरूले निर्बाध रूपमा आफ्नो व्यापार व्यवसाय गर्न पाउनुपर्ने माग राखेका छन् । त्यस्तै उनीहरूले यसअघि महानगरसँग भएको चार बुँदे सहमति कार्यान्वयन गर्न महानगरसमक्ष आग्रह गरेका छन् ।

साँझ ८ बजेको समयमा आफ्नो जीवन निर्वाह गर्नका लागि सडकको पेटीछेउमा सामान बिक्री गर्न खोज्दा नगर प्रहरीले गुण्डागर्दी शैलीमा धरपकड गरेको उनीहरूले बताएका छन् ।

व्यवसायी महानगरले साना व्यवसायीहरूको पुँजी समाप्त गर्ने गरी दमन गरेको भन्दै आन्दोलन गर्नुपरेको जनाएका छन् ।