काठमाडौं– चालु आर्थिक वर्षको ११ महिनामा नेपालमा ५७ करोड २८ लाख ६२ हजार रुपैयाँको महिलाहरूले लगाउने लिपिस्टक आयात भएको छ ।

भन्सार विभागले शुक्रबार सार्वजनिक गरेको तथ्यांकले नेपालमा ११ अर्बभन्दा बढीको शृङ्गारका सामग्री आयात भएको देखाएको छ । तथ्याङकअनुसार चालु आर्थिक वर्षको जेठसम्ममा ११ अर्ब ७२ करोड ६९ लाख हजार रुपैयाँ बराबरको मेकअपको सामान आयात भएको हो । जसमा आँखाको शृङ्गारमा प्रयोग गरिने सामग्री मात्रै २२ करोड ३६ लाख ३४ हजार रुपैयाँको आयात भएको छ ।

यस्तै, नङपालिस ४ करोड ५६ लाख २८ हजार, विवाहित महिलाले प्रयोग गर्ने सिँदुर १ करोड ३६ लाख ५६ हजार र अनुहारमा लगाउने क्रिमहरू मात्रै ९४ करोड ३५ लाख ७८ हजारको आयात भएको तथ्यांकमा उल्लेख छ ।

यस्तै समीक्षा अवधिमा ८६ करोड ९३ लाख ६३ हजारको स्याम्पु, कपालमा लगाउने कलर ७१ करोड ४२ लाख, कपालमा लगाउने (हेयर कन्डिसनर) २० करोड ४ लाख ४६ हजारको आयात भएको छ ।

यस्तै सोही अवधिमा अन्य विभिन्न मेकअपका सामग्री आयातमा नेपालीले ३ अर्ब ३१ करोड १ लाख ९६ हजार रुपैयाँ खर्च गरेको तथ्यांकले देखाएको छ ।

विभिन्न शृङ्गार सामग्री आयातका लागि नेपालबाट वर्षेनी अर्बौँ बाहिरिने गरेको छ । गत आर्थिक वर्षमा पनि शृङ्गारका सामग्री मात्रै नेपालबाट १० अर्ब ७६ करोड १२ लाख १७ हजारको मेकअपको सामग्री आयात भएको थियो ।