काठमाडौं । नेपाल पत्रकार महासंघका अध्यक्ष विपुल पोखरेलले कान्तिपुर पब्लिकेसन्स लिमिटेडका अध्यक्ष कैलाश सिरोहियालाई कार्यकक्षबाटै पक्राउ गरिनु निन्दनीय भएको बताएका छन् ।

प्रतिष्ठित मिडिया हाउसको अध्यक्षलाई कार्यालय समयभित्र कार्यकक्षमा पुगेर गिरफ्तार गरिनु निन्दनीय भएको उनले बताए । यो कार्यले सिंगो मिडिया क्षेत्र नै आंतकित भएको उनको भनाई छ ।

उनले भने, ‘खासगरी राज्यले कोही पनि नागरिकमाथि अनुसन्धान गर्न पाउँछ । त्यसमा कुनै बहस गर्नु आवश्यक छैन । तर, अनुसन्धानका पनि निश्चित विधि छन्, तौरतरिका छन् । एउटा मिडिया हाउस, त्यो पनि प्रतिष्ठित मिडिया हाउसको अध्यक्षलाई जुन ढंगले कार्यालय समयभित्र कार्यकक्षमा पुगेर बलजफ्ती गिरफतार गर्नु अत्यन्त निन्दनीय छ । यसले सिंगो मिडिया क्षेत्रलाई नै आतंकित गरेको छ ।’

विश्वभर नै मिडिया हाउसभित्र प्रहरीको प्रवेशलाई राम्रो अभ्यास नमानिने उनले स्पष्ट पारेका छन् । उनले मिडिया हाउसलाई राज्य वा गैर राज्य दुवै पक्षले आंतकित गर्न नहुने बताएका छन् ।

‘संसार भरी नै मिडिया हाउसभित्र प्रहरीको प्रवेशलाई राम्रो अभ्यास मानिदैन ।किनकी हामीले स्रोतको संरक्षणको कुरा गछौं। सूचनाको सुरक्षाको कुरा गर्छौँ । त्यसकारण मिडिया हाउसलाई आतंकति गर्ने, जो पनि प्रवेश गर्ने, राज्यको होस कि गैर राज्य होस पस्न सक्ने अभ्यासलाई सही भन्न सक्दैनौँ । आज जुन ढंगले कान्तिपुरमा प्रहरीको प्रवेश भएको छ यसले शंक ागर्ने ठाउँ छ । फेरि यत्तिको प्रतिष्ठित मान्छेलाई, राज्यले पनि चिन्ने मान्छेलाई अनुसन्धानका लागि बोलाउँदा उहाँ आफैं पनि जानु हुन्थ्यो होला । तर, कार्यालय समयमा कार्यालयमै प्रवेश गरेर जसरी गिरफ्तार गरेको छ राज्यले सही चरित्र देखाउन सकेन । यसबाट राज्य आतंक भनेर ब्याख्या गर्ने ठाउँ दिएको छ । राज्यले अशल अभ्यास गरोस भन्ने चाहन्छौँ । यो घटनाले राज्यले अशल अभ्यास गरोस् भन्ने चाहनेहरु निराश भएका छौँ ।’