अंकारा- गाजामा इजरालयको आक्रमण जारी रहेका बेला विद्रोही समूह हमासका प्रमुखले टर्कीका राष्ट्रपतिसँग वार्ता गरेका छन्।

टर्कीका राष्ट्रपति रेचेप तैय्यप अर्दोआनले उक्त भेटका क्रममा प्यालेस्टाइनका नागरिकलाई एकताबद्ध हुन अपिल गरेका छन्।

राजधानी इस्तान्बुलमा हमासका राजनीतिक विभाग प्रमुख इस्माइल हानियासँग टर्किस राष्ट्रपतिले कयौँ घण्टा कुरा गरेका हुन्।

इजरायली विदेशमन्त्री इसराइल कात्जले यस भेटवार्ताको निन्दा गरेका छन्। उनले यस भेटलाई लिएर कडा र तिखो प्रतिक्रिया पनि दिए।

इजरायली विदेशमन्त्रीले एक तस्वीर सामाजिक सञ्जालमा पोस्ट गर्दै अर्दोआनलाई लाज हुनुपर्ने टिप्पणी गरेका छन्।

लामो समयदेखि हमास र इस्माइल हानियासँग टर्की सरकारको सम्बन्ध राम्रो रहेको छ।

दुई दिनअघी हमास र र इजरायलबीच वार्ता गरिरहेको कतारले पनि यसबारे आफ्नो भूमिकालाई लिएर विचार गरिरहेको जनाएको छ।

इस्माइल हानिया टर्की जानुलाई अर्दोआन युद्धबीच मध्यस्थाका लागि अग्रसर भएको अनुमान गरिएको थियो।

शनिबार अर्दोआनको कार्यालयले इस्माइल हानिया र राष्ट्रपतिबीच भएको भेटघाटका क्रममा कयौँ घण्टासम्म कुराकानी भएको जनाएको थियो। अर्दोआनले उक्त भेटमा अवस्था जटिल भएकाले प्यालेस्टाइनबासीहरू एकजुट हुन अतिआवश्यक रहेको जनाएका थिए।

राष्ट्रपति कार्यालयको तर्फबाट जारी विज्ञप्तिमा बोस्फोरसको खाडीनजिकै दोलाम्बाचे प्यालेसमा दुई नेताबीच अढाई घण्टा लामो वार्ता भएको उल्लेख छ।

त्यसपछिको विज्ञप्तिमा इजराललाई जवाफ र जीतका लागि प्यालेस्टाइनबासीबीच एकता र अखण्डता देखिनु आवश्यक रहेको अर्दोआनको कार्यालयले जनाएको थियो।