काठमाडौं । आईसीसी यू–१९ विश्वकप अन्तरगत न्युजिल्यान्डविरुद्धको खेलमा नेपालका ओपनर अर्जुन कुमाल ९० रन बनाएर आउट भएका छन् । एक सय चार बलको सामना गरेका अर्जुनले १२ चौकाको मदतमा ९० रन बनाएका हुन् ।

जितको लागि ३०३ रनको विशाल विजयी लक्ष्य पछ्याएको नेपालले ३८ ओभरको खेल सकिँदा आठ विकेट गुमाएर एक सय ८३ रन बनाएको छ ।

नेपाल अर्जुन कुमाल, गुल्शन झा, कप्तान देव खनालसहित ८ ब्याटरलाई गुमाएपछि ठूलो समस्यामा परेको छ ।कप्तान खनाल ३६ रन बनाएर आउट भए भने गुलशन झा र आकाश त्रिपाठी २–२ रनमा आउट भए ।

यसअघि टस जितेर पहिला ब्याटिङ गरेको न्युजिल्याण्डले निर्धारित ५० ओभरमा ८ विकेट गुमाउदै ३ सय २ रन बनाएको थियो  ।न्युजिल्याण्डका लागि स्नेहित रेड्डीले अविजित १४७ रनको शतकीय पारी खेलेका थिए । त्यस्तै, कप्तान ओस्कार ज्याक्सन ७५ रन बनाएर आउट भए ।

त्यसैगरी, नेपाली बलर सुबास भण्डारीले ३ विकेट लिए भने गुलशन झाले २ विकेट तथा दिपेश कँडेल, तिलक भण्डारी र आकाश त्रिपाठीले एक एक विकेट लिएका थिए ।