काठमाडौं- काठमाडौं महानगरपालिकाले त्रिपुरेश्वरस्थित भाटभाटेनी सुपरमार्केट एण्ड डिपार्टमेन्टल स्टोर प्रालिलाई दुई लाख रुपैयाँ जरिवाना तिराएको छ ।

महानगरपालिको कल सेन्टरमा मंसिर १९ मा सुपरमार्केटले ‘बासी सडेको र किरा लागेको खाना बेचेको गुनासो आएपछि अनुगमनका क्रममा देखिएको कैफियतका आधारमा जरिवाना गरिएको हो ।

महानगरपालिका बजार व्यवस्थापन तथा अनुगमन ऐन, २०७७ को दफा २९ को खण्ड (घ) र (ड) बमोजिम कसुर गरेको पाइएको भन्दै सोही ऐनको दफा ३० (१), (ख) बमोजिम दुई लाख जरिवाना गरिएको भाटभटेनीलाई लेखिएको पत्रमा भनिएको छ ।

‘जरिवाना रकम महानगरपालिकाको राजश्व खातामा जम्मा गरी अब उपरान्त बिक्री गर्दा प्रचलित नेपालको कानूनको अधिनमा रही वस्तु उच्च गुणस्तर र खाद्य योग्य भएको निश्चित गरी मात्र बिक्री गर्ने प्रवन्ध मिलाउन होला,’ महानगरले भाटभटेनीलाई भनेको छ ।