काठमाडौं – राष्ट्रिय स्वतन्त्र पार्टीले आन्दोलनको स्वरूप बदल्ने भएको छ। मङ्गलबार र बुधबार बसेको केन्द्रीय समितिको बैठकले आन्दोलनका स्वरूपहरू बदल्ने निर्णय गरेको हो।

बैठकले उपनिर्वाचनमा आन्दोलनको प्रचार गर्ने र सामाजिक सञ्जाल मार्फत तथ्य र वैचारिक हिसाबले आन्दोलन गर्ने बताएको छ। तर सभापति हिरासतमा भएको ठाउँ पोखरामा भने शान्तिपूर्ण तरिकाले आन्दोलन गर्ने रास्वपाको भनाइ छ।

रास्वपा संसदीय दलका उपनेता विराजभक्त श्रेष्ठले खबर हबसँग भने, ‘हामीले २६ ठाउँको उपनिर्वाचनमा भाग लिएका छौं । त्यहाँ हुने घरदैलो र कोडसभामा यो विषयहरू उठाउनेछौं। यस्तै सामाजिक सञ्जाल मार्फत आन्दोलनका विषयमा सत्य र तथ्य प्रमाणहरू सहित आवाजहरू उठ्नेछन् ।’

श्रेष्ठका अनुसार दुई दिन बसेको केन्द्रीय समितिको बैठकले अब सामाजिक सञ्जाल मार्फत वैचारिक र तथ्यगत हिसाबले आन्दोलन गर्न सबैबीच सहमति जुठेको हो।

मङ्सिर २ गतेदेखि राष्ट्रिय स्वतन्त्र पार्टीका सभापति रबि लामिछाने कास्की हिरासतमा छन् । उनलाई गत साता सुप्रिम सहकारीको अनुसन्धान गर्न रूपन्देही समेत लगिएको थियो। सभापति लामिछाने विरुद्ध काठमाडौँबाट पनि पक्राउ पुर्जी जारी भएको छ। उनलाई काठमाडौँ पनि ल्याउने तयारी भइरहेको छ।